Edi Rama e shthuri gojën në nisje të seancës së sotme parlamentare duke sulmuar deputetët e opozitës me epitete fyese si “gjela, këlyshë, të pafytyrë dhe llaxore”.
Gjuha e ashpër e kryeministrit shënoi edhe startin e debatit mbi buxhetin dhe paketën fiskale të vitit 2023, me Ramën që gjithashtu i tha opozitës se ata nuk do të vijnë kurrë në pushtet deri në vitin 2029.
“Ne do vazhdojmë t’iu mundim juve sepse nuk mund ta lëmë biznesin e vogël në dorën tuaj. Nuk iu lëmë asnjë arsye dhe asnjë shteg që deri në vitin 2029 të vini në vendin tonë. Ndërkohë që ne jemi këtu në këtë vend duke vazhduar të mbështesim biznesin e vogël, jo vetëm duke mos i vendosur taksa dhe duke mos i rritur TVSH-në, por duke i paguar faturën e energjisë elektrike”, tha Rama.
Rama u shpreh i sigurt edhe për fitoren e zgjedhjeve lokale të viti 2023, ndërsa premtoi se do të vijojë mbështetjen ndaj biznesit të vogël.
“Bazuar në këshillimin kombëtar ku morën pjesë mbi 500 mijë shqiptarë kemi vendosur të rrisim shumë fort penalitete për biznesin e madh. ne ndryshe nga çfarë na pikturoni ju jemi në anën e biznesit të vogël dhe të njerëzve të zakonshëm. Ne jemi ata që vazhdojmë të konfiskojmë metrat e babëzisë të atyre që i quajmë oligarkë. Do t’i rrisim penalitetet për biznesin e madh për t’i thënë rri në vendin tënd”, u shpreh ai.
