Akuza të ndërsjella janë shkëmbyer sot në Kuvend midis Edi Ramës dhe deputetëve të opozitës, por pas fjalës së kryeministrit në Foltore një debat me tone të ashpra shpërtheu veçanërisht mes tij dhe Enkelejd Alibeaj.
Deputeti i PD kritikoi ashpër gjuhën fyese të përdorur nga Rama duke kërkuar nga kryetarja e Kuvendit që të marrë masa pasi është shkelur etika.
“Ky që po ikën ishte mirë që të dëgjonte diçka. Vetëm një njeri që gdhihet në pikë të mëngjesit dhe ka një hall të madh, vjen në parlament dhe nxjerr këtë gjuhë. Unë e kuptoj që do donte mirë që të flisnim edhe këtë gjuhë, t’i shkonim tek foltorja sepse vetëm në këtë mënyrë mund të mbulojë atë se çfarë është duke gatuar. Unë i kërkova një gjë të thjeshtë, nxirr letrat bëj transparencë, për ta kuptuar të gjithë. Duhet t’i tërhiqni vëmendjen parafolësit dhe ka folur një gjuhë jo parlamentare”, tha Alibeaj.
Menjëherë reagoi kryeministri, i cili përveçse e etiketoi si “kryetar të grupit të bedelave”, i tha deputetit demokrat se sillet sikur është kryetar i PD-së.
“Dëgjo këtu zotrote, nuk ka asgjë më të rëndë, asgjë më të shpifur, më jo etike se sa ti ngresh dhe i ulësh njerëzit kriminelë, hajdutë, pazarxhinj, të korruptuar, vjedhës. Këto janë shumë-shumë më të rënda se sa e vërteta që ju jeni këlyshë të rrahur që të vegjël që kur keni hyrë në derën e SHQUP-it. Që ju bëni si llazore edhe ky është një fakt, sepse vetëm llazoret e mbetura rrugëve, pasi kanë pirë gjithë natën dhe nuk gjejnë dot shtëpinë sepse janë të mbufatura nga trutë, mund të çohen në pikë të sabahut e të ngrenë lagjen në këmbë që këtu po ndodh një krim i madh. Ju jeni të pafe, pa atdhe, ju jeni pa din e iman, për këto keni lënë prova. Ju nuk dini të ndani as opinionet e ndryshme, as pozicionet e ndryshme, as qëndrimet e ndryshme, duke ruajtur njerëzillëkun. Jeni të gatshëm të nxirrni nga goja të gjitha të zezat, t’i bëni të gjithë ata që keni përballë hajdutë e kriminelë dhe të çmendni një popull që në pikë të mëngjesit. Pazari i syve që nuk të shohin sepse i ke të mbyllura komplet, dhe i veshëve që nuk dëgjojnë. Ti je një gojë që vazhdon jeton duke atë që ke bërë qysh se ke hyrë në këtë parlament, bishtin e non-gratës, pavarësisht se nuk e ke në krye, ti non-gratën e ke në kokë dhe koka jote nuk ka asnjë shans të shpëtojë nga non-gata. Ky është një opinion i mbështetur në fakte. Ti s’ke çfarë kërkon fare që unë të kërkoj ndjesë, je një kryebedel i një tufe bedelësh që nuk kanë din, iman, nuk kanë fe, nuk kanë atdhe”, tha Rama.
