Partia Demokratike ka thirrur një protestë kombëtare më 12 nëntor, teksa përgatitjet për pjesëmarrje masive janë duke u kryer nga të gjitha degët e selisë blu.
Tubimi do të jetë një simbol i ngritjes përballë krizës ekonomike, valës së largimit të shqiptarëve, çmimeve të rritura të karburanteve dhe ushqimeve por edhe autoritarizmit të qeverisë Rama.
Ish-kryeministri Sali Berisha zbuloi të shtunën në një bashkëbisedim me qytetarët në Facebook se protesta do të nisë në orën 16:00, ndërsa këtë javë e ka nisur duke postuar edhe sloganin e këtij tubimi.
“Ndodhemi në një proces ku çdo njeri prej nesh duhet të marrë përgjegjësi të bëjë çdo gjë për një kthesë të rëndësishme të kësaj shoqërie dhe këtij vendi. PD është e përqendruar në realizimin e kësaj kthese të madhe. Agjenda konsiston në protestën e fuqishme të orës 16:00 të datës 12 nëntor në të cilën pjesëmarrja juaj, e mbarë qytetarëve shqiptarë, e të rinjve, të moshuarve, është një kusht me rëndësi për triumf”, tha Berisha të shtunën.
Sa i përket sloganit, thirrja kryesore që i drejtohet shqiptarëve përkrah mesazhit “Shqipëria në rrezik”, është: “Protesto, t’i dalim Zot bashkë”.
Në foto bie në sy edhe mbishkrimi “Policia eskortë e kriminelëve”, mbi foton e kryeministrit Edi Rama në një nga takimet e tij me efektivët ku prezantonte arritjet në ruajtjen e rendit dhe sigurisë në vend.
