Belind Këlliçi, një nga kandidatët e primareve të PD për Tiranën, ka dorëzuar një padi në Gjykatës ndaj 2 policëve, që sipas tij e kanë dhunuar gjatë protestës për Teatrin Kombëtar.
“Në gjyq për policët që më dhunuan mua dhe dhjetëra të rinj. Prokuroria ka çuar dosjen në gjykatë me policet e akuzuar që kane kryer veprime arbitrare”, tha deputeti i PD për mediat.
Këlliçi tha se ishin identifikuar dy policët të cilët e kishin dhunuar gjatë protestës së ndodhur 2 vite e gjysmë më parë. Ndërsa shtoi se seanca e sotme ishte shtyrë për shkak të mungesës së një prej të pandehurve.
Këlliçi theksoi se gjatë këtij procesi do të kishte “surpriza dhe çudira”.
“Natën kur u shemb teatri, jemi marrë forcërisht nga policia, e drejtuar në atë kohë nga Sandër Lleshaj. Policë që nuk kuptoheshin se ça ishin, jemi dhunuar. Unë atë natë u mora dhunshëm, u dërgova në komisariat në Kombinat, pse po mbroja teatrin Kombëtar. Kam kryer analizat mjeko-ligjore, dhe eksperti ka konstatuar dëme ndaj personit tim. Unë i kam thënë fjalën artistëve, aktivistëve, se do i shkoja çështjes deri në fund. Do të shkojmë në gjyq me ata policë, për të vërtetuar dhunën ndaj meje, Ata policë që kanë ushtruar dhunë atë natë, duhet të mbajnë përgjegjësi. Sot u shty seanca për në muajin dhjetor, pasi mungonte një prej të pandehurve. Do shihni çudira gjatë këtij procesi. Do i shkoj deri në fund kësaj çështje. Nuk është vetëm Belindi. Skam qenë i vetëm atë natë në qeli. Inkurajoj çdo qytetar, që sa herë i shkelen të drejtat, të mos stepen dhe mos të kenë frikë.”, tha Këlliçi.
