Është ekstraduar nga Shtetet e Bashkuara të Amerikës, drejt Shqipërisë një shtetas i dënuar me 25 vjet burgim.
Policia njofton se në pranga ka rënë Lulëzim Sinaj i cili në 2017 ka plagosur rëndë, me armë zjarri, shtetasit E. Xh. dhe L. Xh., prindërit e ish-bashkëshortes së tij.
“Ky shtetas ishte shpallur në kërkim ndërkombëtar, pasi Gjykata e Rrethit Giyqësor Fier, në vitin 2021, e ka dënuar me 25 vjet burgim, për veprat penale “Vrasja në rrethana të tjera cilësuese”, kundër dy ose më shumë personave, mbetur në tentativë, dhe “Prodhimi dhe mbajtja pa leje e armëve luftarake dhe e municionit“”, njofton policia.
Përmbledhje e ngjarjes së ndodhur:
Më 13 mars 2017, Lulzim Sinaj pas divorcit me gruan e tij, plagosi me armë zjarri prindërit e ish-bashkëshortes, Edmond dhe Ludmilla Xhaferaj.Gruaja mori 2 plumba, ndërsa burri 3 plumba në trup.
Sinaj kishte jetuar me bashkëshorten e tij prej disa kohësh (5 vite) në Amerikë, por në vitin 2016 çifti ishte kthyer në Shqipëri.
Pas kthimit, mes tyre nisën edhe konfliktet e mosmarrëveshjet që çuan në divorc.
Sipas burimeve të Policisë, asokohe dhëndri kishte akuzuar prindërit e ish-bashkëshortes si shkaktarët që kishin bindur të bijën për t’i dhënë fund martesës.
Natën e plagosjes, ai dyshohet se ishte në gjendje të dehur kur trokiti në derën e ish-vjehrrit të tij.
Mes tyre pati fillimisht një debat dhe më pas Sinaj nxori armën duke qëlluar fillimisht ish-vjehrrin e më pas edhe bashkëshorten e këtij të fundit.
