Kryeministri Edi Rama është pyetur nga gazetarët në konferencën e përbashkët për mediat me kancelarin gjerman Olaf Scholz dhe Presidenten e KE, Ursula von der Leyen për përplasjen që është krijuar në distancë midis tij dhe ministrave të qeverisë britanike lidhur me krizën e azilkërkuesve shqiptarë.
Ashtu siç ka bërë në postimet e tij në Tëitter, Rama i ka kujtuar Britanisë se në ishull jetojnë mbi 140 mijë emigrantë shqiptarë në mënyrë të ligjshme, të cilët janë të integruar në shoqëri dhe botën e biznesnit, ndaj gjuha me të cilën ministrja Suella Braverman po i drejtohet këtij komuniteti është e papranueshme.
“S’do ta pranojmë kurrsesi këtë retorikë. Komuniteti shqiptar në Britani nuk është i lartë dhe janë tërësisht të respektuar. Janë 1200 drejtues biznesesh shqiptarë dhe akademikë të mirë respektuar. Dhe kur vjen fjala për kriminelët në burgjet britanike shifrat flasin për më pak se 1%. Kështu që të shënjestrosh një komunitet dhe të flasësh për kriminalitet nuk tingëllon si diçka britanike, por si një çmenduri”, tha Rama.
Duke risjellë edhe njëherë në kujtesë problemin që u krijua në 2015-2016 me azilkërkuesit shqiptarë në Gjermaninë e përmbytur me refugjatë dhe zgjidhjen që kancelarja Merkel i dha krizës duke përforëcuar legjislacionin dhe kriteret e pranimit, Rama i kërkoi Londrës zyrtare që të bëjë të njëjtën gjë.
“Gjermania pati një problem të ngjashëm, ku me krizën e refugjatëve njerëz nga rajoni ynë dhe nga Shqipëria shkuan por nuk dëgjova asnjë politikan gjerman e jomë ministra të flasin për pushtim. Nuk dëgjova asnjë politikan e jo më ministër të Brendshëm që të thotë se shqiptarët janë kriminelë dhe sjellin kriminelë, por pashë një qeveri mjaft të interesuar për të zgjidhur çështjen me shqiptarët, duke e radhitur Shqipërinë në vendet e sigurta të origjinës dhe forcuar sistemin e aplikimeve dhe duke i dhënë fund asaj trazie në mënyrën më dinjitoze dhe të respektuar. Dhe në vend të ndizej një narrativë e çmendur gangsterësh për të maskuar politikat e dështuara, politikanët gjermanë ishin krejt e kundërta. Përfaqësuesit e Britanisë duhet të vijnë në Gjermani e të mësojnë shpejt të ndreqin problemet e tyre. Shqipëria s’është këtu që të ndreqë problemet në Britani”, deklaroi kryeministri.
Në fund ai tha se qytetarët shqiptarë kanë mbërritur në brigjet veriore të Francës në mënyrë të ligjshme si qytetarë të zonës Schengen dhe s’është problem i Shqipërisë apo Francës, fakti që politikat e Britanisë për të kontrolluar lëvizjen në Kanal kanë dështuar.
“Qytetarët tanë që kanë mbërritur në Francë kanë qenë të ligjshëm, s’ka përgjegjësi Franca apo Shqipëria. Por nëse ka një problem me Britaninë në Kanal, le ta zgjidhin vetë. E di që kjo ka qenë më tepër problem me Brexit. Nuk duhet pranuar kurrsesi kjo lloj retorike, shqiptarët atje janë të shkëlqyer, nuk janë miliona”, nënvizoi Rama.
