Sot është afati i fundit i ultimatumit që i kanë vendosur pedagogët qeverisë shqiptare për të plotësuar kushtet, mes tyre edhe rritjen e pagave e cila kërkohet të jetë në të njëjtin nivel me vendet e tjera të rajonit.
Gjatë inaugurimit të shkollës së re “Klodian Tanushi” në Dajt, Rama i ka “mbyllur derën” e bisedimeve duke thënë se nuk do të ketë rritje të pagave për pedagogët të cilët kanë paralajmëruar se sot në orën 16:00 do të hyjnë në grevë urie. Rama vazhdon gjuhën e urrejtjes duke i quajtur pedagogët “njerëz të pa fe, e pa flamur”.
Rama: “Jeni këtu për të kremtuar një dëshmor, një mesazh kuptimplotë të dikujt që dje dha jetën për atdheun, ndërkohë sot në kushte të vështira, një çetë, një pakicë nën drejtimin e një SHIK-si i cili ka uzurpuar sindikatën e ashtëquajtur të pedagogëve del me ultimatum se nëse nuk rriten rrogat hyjnë në grevë urie. Në grevë urie hyjnë njerëzit pa fe, pa flamur! Nuk bëjnë prindërit e këtyre njerëzve grevë për rroga që me siguri i kanë pagat shumë më të ulëta.
Luftohet për të drejta themelore, jo për rroga, rritje më të madhe të rrogave në këto kushte e kanë pasur pikërisht pedagogët, nuk ua rritëm mësuesve që kanë një punë shumë më të vështirë, se këta që kanë paturpësinë të dalin në media. Si mundet një misionar i arsimit të dalë ashtu? Dalin e thonë nuk ia vlen të jesh pedagog, nuk mund të jetë më pedagog! Edhe një herë e përsëris, shumica e pedagogëve nuk janë këta, se përndryshe do të ishte alarm. Më vjen keq që u detyrova të flas për këtë. Shiksi që u shërben rublave ruse jo atdheut, ndryshe nga djali emrin e të cilit do të mbajë kjo shkollë”
