Trajneri i Vllaznisë, Mirel Josa ka dalë përpara mediave sot në konferencën e zakonshme për shtyp (pragsfida me Kukësin). Tekniku i shkodranëve foli për tema të ndryshme, duke filluar që nga kampionati, rivalët, mundësitë, apo edhe situata e disa lojtarëve.
“Unë nuk do ta shoh ndeshjen me momente, do ta shoh ndeshjen që luhet Kukësi-Vllaznia, ndeshje shumë e rëndësishme për të dy skuadrat siç është edhe ndeshja e kampionatit për secilën skuadër, duke parë klasifikimin siç është ngjeshur në këtë mënyrë.
Kampionatin nuk mund ta quaj të dobët, por që ka rivalitet. Të gjithë ekipet kanë mësuar të luajnë futboll, lojtarët duket që janë më të ndërgjegjshëm për atë që japin në fushë, duke parë të gjitha skuadrat në përgjithësi. Ndaj do të jemi në këto ujëra gjatë të gjithë kampionatit. Problemi është që duhet të rritim stabilitetin tonë se personalitetin si skuadër e ka Vllaznia. Por duhet të rritet besimi te individualitetet që ka kjo skuadër dhe të rritësh besimin është diçka shumë e lehtë, rritet qoftë me lojë, punë, stërvitje, duke bërë të gjithë gjërat që ne themi. Por nuk do të thotë që të gjithë gjërat që themi në letër dhe në teori, të dalin në fushë se luajmë me kundërshtarë.
E thashë edhe pas ndeshjes që kishim me Erzenin, Latifi do kohë të vijë në gjendjen optimale. Ju po e shihni se çfarë po ndodh me lojtarët e tjerë, i vetmi që ka hyrë direkt në ritëm ishte Jonuzi se kishte pauzë më të shkurtër. Ndaj dalëngadalë po mendojmë të rritim gjendjen e lojtarëve të dëmtuar, për të rritur gjithashtu dhe për të marrë maksimumin si skuadër. Ne këto zëvendësime që kemi pasur gjatë kohës që lojtarët kanë qenë të dëmtuar, i kemi zëvendësuar me të tjerë të cilët për mendimin tim kanë bërë maksimumin dhe kanë qenë gati në momentin e duhur.
Vulaj ka luajtur në ndeshjen e fundit me Flamurtarin dhe ka qenë në formacion, mua nuk më intereson nëse është Kupë apo nëse është kampionat. Skuadrën e kemi parë që ka qenë e plotë edhe në ndeshjen me Flamurtarin, këto janë mendimet e mia sa i përket Vulajt dhe skuadrës se unë nuk mendoj për individin por për skuadrën. Nuk ndërroj sistem loje dhe ta dini edhe këtë, po ua them edhe këtë që të mos e prekim më këtë temë. Nuk ndërroj një sistem loje sepse një lojtar luan në atë mënyrë. Nëse lojtari i përshtatet sistemit të lojës që ne kemi bërë zgjedhjen e lojtarëve në fillim, atëherë bujrum jo Vulaj, por kushdo qoftë do të jetë në lojë. Kjo është një temë që mua më shqetëson se është një lojtar që paguhet dhe është paguar që në fillim mirë nga presidenti. Por të gjithë lojtarët fillimisht janë për të marrë rrogat e tyre dhe ato çfarë ka për pluse sa i përket anës ekonomike, por përtej anës ekonomike është edhe çfarë japin për skuadrën. Dhe mua më intereson skuadra ndaj këtë mos ma përsëritni më.
Nuk kam bërë planet e janarit. Vulaj është një futbollist që ka kontratë. Për këtë mund të pyesni presidentin. Nuk diskutojmë për këtë probleme, e thashë që mos ma përsëritni më. Po flasim për skuadrën dhe jo për individ dhe mua më intereson skuadra.
Nuk ka çaluar Vllaznia në pjesën e dytë se ndërroi lojën, por çaloi më shumë në pjesën e parë. Duhet ta shihni lojën si e shoh unë, jo ju, në anën profesionale. Ne kemi bërë gabime dhe i kemi parë shumë mirë si i kemi bërë, sidomos në dy ndeshjet ndaj Bylis dhe Erzenit, ka qenë thuajse një fotokopje e të dy ndeshjeve. Por unë them që problemi është më tepër psikologjik dhe personaliteti, ky personalitet na ka munguar. Nuk rritet, është ai që është dhe përbëhet nga individualet e lojtarëve që janë në përbërje të skuadrës.
Kukësi është skuadër e ndërtuar për të fituar, kështu ka qenë ndërtuar edhe kur isha unë në drejtimin e tij, nuk është mirë të merremi me të. Çdo skuadër që hyn në lojë, hyn në lojë për objektivat e veta dhe për çdo skuadër është të fitojë ndeshjen.
Futbolli i ka të gjitha brenda, por nuk do të thotë që të jemi të kënaqur me një pikë pasi jemi të sigurt se do të fitojmë tjetrën këtu. Kjo garanci mua nuk po më jepet. E kërkojmë, do ta gjejmë, besoj se me djemtë që kam në skuadër do ta gjejmë sesbën.
Jo se nuk kam filluar të mendoj për merkaton e janarit, por do të shohim se çfarë do të na shfaqet apo kërkojmë, se periudha e janarit është e vështirë për transferime sepse lojtarët e lirë zënë vend që në fillim të sezonit. Do të bëjmë çfarë është më e mira. Unë kam lojtarët e të shohim se çfarë lëvizjesh do të bëjmë. Skuadra nuk ka nevojë vetëm për sulmin, ka nevojë edhe për mbrojtje”, tha Josa.
