Komisioni i Pavarur i Kualifikimit (KPA) ka konfirmuar në detyrë gjyqtaren Nurjeta Pogaçe. Vendimi është marrë këtë të Mërkurë.
Pogaçe u përball të hënën më 31 tetor me gjetjet e Komisionit të Pavarur të Kualifikimit, KPK në të tre kriteret e rivlerësimit, për të cilat dha shpjegime në mënyrë të përmbledhur gjatë seancës dëgjimore.
Rivlerësimi kalimtar për gjyqtaren Pogaçe u krye nga trupa e KPK e kryesuar nga Roland Ilia, me relatore Pamela Qirkon dhe anëtare Brunilda Bekteshin. Në cilësinë e vëzhgueses ndërkombëtare ishte e pranishme Maria Tuma.
Sipas KPK, subjekti ka kryer deklarim të pasaktë për sipërfaqen e një shtëpie banimi në Tiranë në bashkëpronësi me anëtarët e familjes së origjinës, ku Pogaçe zotërin 1/6 pjesë takuese dhe ka shënuar se ka një sipërfaqe 443 m2.
Në seancën dëgjimore, gjyqtarja tregoi se pronën e kishte trashëgimi ligjore nga babai bazuar në një vendim gjykate të vitit 2003, kohë para se Pogaçe të fillonte detyrën, por nga hetimi ka rezultuar se shtëpia ka sipërfaqe ndërtimi rreth 177 m2, ndërsa pjesa tjetër është oborr.
Lidhur me këtë konstatim, Pogaçe deklaroi se pamundësia finaciare lidhet me vëllain e saj. Ajo vërejti se vëllai nuk është përpjekur të krijojë burime të rreme për blerjen e mjetit dhe se është përpjekur të vërtetojë të ardhurat e siguruara nga shërbimet e kryera si inxhinier. Pogaçe solli në vëmendje një vendim të KPK-së, ku është vlerësuar se mospagimi i detyrimeve nga punëdhënësi personit të lidhur, nuk duhet të rëndojë mbi subjektin e rivlerësimit. Drejtoria e Sigurimit të Informacionit të Klasifikuar, DSIK ka dorëzuar raport pozitiv për gjyqtaren Nurjeta Pogaçe.
Komisioni nuk ka gjetur probleme në tre dosjet e përzgjedhura nga subjekti në funksion të rivlerësimit profesional dhe as në ato pesë të shortuara që nga emërimi në vitin 2015 në Gjykatën e Durrësit, ku dhe vijon ta ushtrojë.
