Kryetari i Këshillit Kombëtar të Partisë Demokratike, Edi Paloka thotë se grupimi i deputetit Enkelejd Alibeaj ka kërkuar eleminimin e procesit të primareve dhe strukturave në këtë forcë politike.
Në një deklaratë për mediat jashtë selisë blu lidhur me dështimin e negociatatve në PD, Paloka u shpreh se ata kërkuan edhe krijimin e një strukture jashtë strukturave ekzistuese dhe të kishin votë unanime.
“Nuk ka asnjë pikë qoftë edhe në statut që ne të na përplaste për primaret. Gjithë kohën, këmbëngulja ka qenë eleminimi i primareve. Aty kërkohet praktikisht eleminimi i gjithë strukturave që ishin ngritur, nga një vit sakrificash, vit jo i lehtë. Theksohej se kërkohej një strukturë jashtë këtyre strukturave, të cilat të ishin me numër të barabartë dhe të merrte vendime me votë unanime. Pse duhet të kërkohet veto, një votë unanime në një moment që po hyn për të bashkëpunuar. Asnjë kusht nuk kemi vënë ne, përveç primareve”, theksoi Paloka.
“Po ju them sot që bisedimet nuk kanë filluar me zotin Bardhi, kanë filluar përpara me përfaqësues të tjerë. Nuk po e them emrin përderisa ai nuk dëshiron të bëhet publik. Vullneti për primaret nuk është diskutuar, para se të shpallnim zyrtarisht bisedimet. Do ju them edhe diçka tjetër, që nuk është as në statut. Unë vetë i kam ofruar që në rast kur ne shohim që kemi një kandidat shumë të mirë, që mund të jetë i asaj pale dhe kjo situatë konfliktuale e krijuar në këto momente mund ta pengonte të kandidonte, i ofrova edhe mbështetje publike këtyre kandidatëve. Gjatë primareve mund të dilja unë apo dikush tjetër për ta mbështetur publikisht kandidatin që do të donim që të fitonte duke shkelur etikën ndaj kandidatëve të tjerë. Pra janë bërë edhe oferta të tilla gjatë kësaj kohe”, shtoi ai.
Edhe pse prej disa javësh u zhvilluan bisedime mes dy palëve për të dalë me kandidat të përbashkët në zgjedhjet e ardhshme lokale, negociatat dështuan.
Përmes një njoftimi, Grupi Parlamentar i Partisë Demokratike ka deklaruar se pala tjetër ka vendosur si kusht gjatë bisedimeve, që të njihet “Statuti i 11 Dhjetorit”, ç’ka sipas tyre, ka minuar bisedimet për të gjetur zgjidhje për zgjedhjet.
Kryetari i Partisë Demokratike, Sali Berisha tha se opozita s’mund të pengohet nga asnjë për të fituar zgjedhjet, ndërsa paralajmëroi se “ai qe prek flamurin e PD i ka bërë hesapet shumë, shumë keq”.
