Në Komisionin për Çështjet ligjore është duke u diskutuar sot projektbuxheti për vitin 2023, ku është regjistruar një përplasje midis deputetit të PD, Enkelejd Alibeaj dhe përfaqësuesve të Gjykatës Kushtetuese.
Sekretari i Përgjithshëm i GJK, Eugen Papandile në fjalën e tij kërkoi shtim të fondeve për këtë organ të drejtësisë, duke përmendur mungesën e makinave për institucionin dhe instalimin e sistemit antizjarr në godinë.
“Duam qera për të vendosur makinat e institucionit. Ne tashmë kemi lidhur kontratën dhe duhet të zbatohet deri në fundit. Ndërkohë që administrata duhet të lëvizë, nuk parkon dot se ka fashë orare. E duam 24 orë, jo aq sa është fasha orare. Një tjetër është si pjesa e sistemit antizjarr. Po jo kur të na bjerë zjarri dhe të na thoni se pse na ra. Kushtetuesja nuk ka pasur ndonjëherë luksin të ketë një sistem të tillë. Duhet të shtoj edhe që pjesa e fondeve të hequra në mes të vitit dëmton funksionalitetin e institucionit. GJK është e vetmja që e ka autonominë. Duhet të na lajmëroni përpara nëse ka ndonjë fatkeqësi natyrore, por për të tjera duhet të mos ndryshohet buxheti. Të lajmërohet para dhe e dimë ne se çfarë shkurtojmë dhe çfarë jo”, tha Papandile.
Fjala e tij duket se nuk u prit mirë nga Alibeaj i cili e konsideroi absurd faktin që Gjykata Kushtetuese i drejtohet qeverisë duke kërkuar para, pasi sipas deputetit kjo cënon pavarësinë e organit të drejtësisë nga ekzekutivi.
“E kam edhe për përfaqësuesit e gjykatës që po ikin. Situata që krijohet në Komision të ligjeve sidomos në Gjykata Kushtetuese është surreale jemi në një situatë ku GJK lyp para dhe ne të tjerët futemi në të absurd dhe japim lëmoshë për qiranë e makinave apo ndonjë kërkesë që nuk u bën nder institucionit”, tha Alibeaj.
PJESË NGA DISKUTIMI NË KOMISION:
Alibeaj: Elementi thelbësor i pavarësisë është pavarësia financiare. Në kushtetutë thuhet Gjykata Kushtetuese ka buxhet të veçantë që e administron në mënyrë të pavarur. Dua të di, si e keni konceptuar këtë parashikim kushtetues që është reflektuar edhe në ligjin gjykatës kushtetuese. A e praktikon qeveria që nëse gjykata kushtetuese kërkon 10 lekë dhe ju të jepni 7? Ja përcaktoni ju vetë se si duhet ta administrojë buxhetin? Dua të di si e ka konsideruar Gjykata Kushtetuese këtë administrim të pavarur, sa kohë që Gjykata Kushtetuese është gardiani i Kushtetueses?
Çausholli: Buxheti i institucioneve të pavarura zbaton ligjin ku janë parashikuar shpenzime koherente dhe kapitale.
Alibeaj: Gjykata Kushtetuese bën analizën e nevojave që ka, ju paraqet kërkesën, ju si qeveri i jepni të drejtën vetes që ta shkurtoni këtë buxhet apo respektoni si e sjellin ata kërkesën.
Çausholli: Kjo është një procedura më e gjatë, buxheti kalon në dy deri në tre cikle të përgatitjes dhe miratimit të tij, kërkesat paraqiten në formë zyrtare dhe vlerësohen nga pikëpamja teknike nga Ministria e Financave. Pasi bëhet një analizë, paraqitet me shkrim aty ku mendohet se ku duhet përmirësuar. Pas kësaj vjen faza tjetër më e abdejtuar me situatën dhe jepet një kufi i parashikuar që ne i quajmë si tavane buxhetore se cilat janë prioritet e institucionit.
Alibeaj: E kam edhe për përfaqësuesit e gjykatës që po ikin. Situata që krijohet në Komision të ligjeve sidomos në Gjykata Kushtetuese është surreale jemi në një situatë ku GjK lyp para dhe ne të tjerët futemi në të absurd dhe japim lëmoshë për qiranë e makinave apo ndonjë kërkesë që nuk u bën nder institucionit. Vetëm në këtë rast nuk nevojë për ndryshime ligjore. Institucionet e pavarura nuk duhet të shkojnë të lypin para tek qeveria pasi misioni i tyre është të kontrollojnë qeverinë. Nuk është normale që Gjykata Kushtetuese të jetë në krah me qeverinë dhe t’i kërkojë mëshirë në aspektin financiar.
