Bashkimi Evropian do t’i dhurojë Serbisë shifrën prej 160 milionë eurosh me qëllim implementimin në ekonomi për zbutjen e efekteve të krizës energjetike që ka përfshirë kontinentin tonë si pasojë e luftës në Ukrainë.
Shuma e premtuar nga Presidentja e Komisionit Evropian, Ursula von der Leyen në takimin e Nishit me Presidentin Vuçiç është sa dyfishi i asaj që iu premtua Shqipërisë pak ditë më parë, ndërsa fondit total për Ballkanin Perëndimor shkon në 500 milion euro.
Premtimin, von der Leyen e bëri në mbyllje të turit të saj ballkanik, teksa Presidenti i Serbisë, Aleksandër Vuçiç, i rezervoi një pritje në Nish, ku vizituan punimet për ndërtimin e interkonjeksionit të gazit Serbi-Bullgari, projekt i cili duhet të përfundojë deri në shtator 2023.
Por, çështja e sanksioneve të munguara të Beogradit ndaj Rusisë për të dënuar luftën në Ukrainë nuk mbeti jashtë kësaj vizite, me Von der Leyen që la të kuptohet se pa ndëshkimin e Moskës, nuk ka përparim në rrugën e pranimit në BE.
“Shpejtësia e procesit të zgjerimit të BE-së është në duart e vendeve që duan të anëtarësohen. Këtu nuk po e nisim nga e para, tashmë keni bërë shumë. Por, është e nevojshme të ndajmë të njëjtën vlerë dhe të harmonizojmë politikën e jashtme”, tha Presidentja e Komisionit Europian.
Në reagimin e tij, presidenti serb pohoi mos vendosjen e sanksioneve ndaj Rusisë, por i kujtoi zyrtares së lartë të Brukselit se Beogradi respekton integritetin territorial të Ukrainës, por integriteti territorial i Serbisë nuk respektohet.
Leyen foli edhe për çështjen e targave, ku bëri me dije se BE dhe partnerët e tij po punojnë për një zgjidhje, e cila, sipas saj, do të vijë së shpejti.
