Vendimi më i fundit i ERE për të mbajtur në fuqi vendimin e kaluar ku parashikohej aplikimi i fashës 800 kWh duke nisur nga 1 nëntori, riktheu “ethet” e rritjes së çmimit të energjisë elektrike për mbi 71 mijë familje shqiptare që preken nga kjo masë.
Opozita reagoi me urgjencë, teksa deputetja e PD Jorida Tabaku ishte e para që nga përfundimi i mbledhjes së ERE që rrëzoi kërkesën e propozuar prej saj, e cila e dënoi masaat e marra nga qeveria, të cilat do të çojnë çmimin nga 9.5 lekë për kilovat në 45 lekë.
Por, reagimet e opozitës dhe kronikat në media për ditët e vështira që po afrohen dhe që do të rrisin kostot në xhepat e qytetarëve, duket se nuk i kanë pëlqyer kryeministrit Edi Rama, i cili ka zgjedhur sot të hidhet në “sulm”.
Duke shfrytëzuar postimet në Twitter, Rama nuk e konsideron rritjen e çmimit të energjisë si shtrenjtim, por mbrojtje të konsumatorit.
Rama vijon t’i mëshojë qëndrimit të shprehur që në prill kur fasha 800 kWh fillimisht u propozua duke thënë e cilësua pjesë të paketës së masave që mbron qytetarët e thjeshtë të Shqipërisë, pavarësisht se nga përllogaritja rezulton se mijëra familje do të preken prej saj.
Rama nuk ka nguruar as të sulmojë opozitën, duke i kujtuar financimet ruse.
“Opozita e Rublave e mediat e saj po u thonë sot shqiptarëve se Qeveria ka deklaruar rritjen e çmimit të energjisë në 1 nëntor! Një lajm dyfish i rremë: Kemi 14 muaj që themi çmimi do mbrohet siç po mbrohet dhe s’e kemi deklaruar kurrë diçka të tillë! Pse e bëjnë?”, shkruan Rama.
