Kryetari i Bashkisë së Tiranës, Erion Veliaj është politikani shqiptar me më shumë udhëtime drejt Iranit, u shpreh këtë të Premte kreu i PD-së Sali Berisha. Në konferencën e përjavshme me gazetarët, Berisha ngriti dyshime për lidhje të Veliajt me Tehranin zyrtar.
Berisha tha se Veliaj mund të ketë gisht në publikimin e informacioneve nga grupi “Homeland Justice” lidhur me fluturimet e kryera nga kryeministri Edi Rama.
“…Nuk mund të mashtrojë, nuk mund të gënjejë, të gjitha këto janë të nxjerra nga TIMS-i. Ia nxori Homeland, apo Erion Veliaj, ky është problem tjetër, nuk ka rëndësi për mua. Rëndësi ka qe është dokumenti i abuzimit më të madh pas djegësave të këtij njeriu në detyrë. Nuk ka skandal më të madh…”, tha Berisha.
I pyetur më tej nga gazetarët për çështjen, ai tha se Erion Veliaj ka udhëtuar në mënyrë frekuente në Iran.
“Udhëtimet e Erion Veliajt në Iran gjatë kohës që kam qenë kryeministër, kanë qenë frekuente sipas agjencive partnere. Se cila është lidhja e tij me Teheranin, nuk kam arritur ta zbuloj. Di që edhe Edi Rama ka bërë udhëtim, por në atë rast ka qenë një mbledhje e Internacionales Socialiste. Se çfarë dimensioni kanë lidhjet e Erion Veliajt dhe a janë biznesi, lidhje biznesi, apo lidhje të tjera, këtë nuk e di. Di që ai bënte udhëtime. Ishte politikani i vetëm shqiptar që bënte udhëtime frekuente në Teheran”, deklaroi Berisha.
Me Tehranin zyrtar, qeveria ka ndërprerë lidhjet diplomatike, pasi e akuzon se qëndron pas sulmeve të fundit kibernetike ndaj faqeve online të institucioneve shqiptare.
