Prej dy javësh pedagogët vijojnë bojkotin e mësimit në universitete, pasi qeveria nuk ka plotësuar kërkesat e tyre, mes të cilave rritja e pagave për të dhe stafin ndihmës si dhe rritja e financimit për kërkimin shkencor.
Ata bëjnë me dije se nuk do të tërhiqen derisa kërkesat e tyre të plotësohen, ndërsa kanë lajmëruar se ditën e sotme do të nisin një grevë urie.
Kreu i sindikatës së pedagogëve, Sandër Kovaçi: “Bëjmë thirrje të gjithëve të jemi prezent për ndryshime në arsimin e lartë publik. Bëjmë thirrje që në procesin e rritjes së iniciative financiare të mos përjashtohen stafet akademike administrative. Kërkojmë që 30 % këtë të jetë edhe për stafin akademik. Kërkojmë që tarifat e studentëve të përdoren për studentët. Theksoj që kërkimi shkencor është thelbësor në Arsimin e Lartë. Është në gjendje alarmi. Pra nuk jemi të kalojmë në fazën e fundit të grevës së urisë, po është kërkesë e disa sindikalistëve, por nëse vërtet nuk do të ketë reagim mund të shkojmë edhe në këtë fazë”, u shpreh ai.
Ndërkaq ditën e hënë në orën 11:00, do të mbajnë edhe protestën e radhës kombëtare.
Kërkesat e pedagogëve drejtuar qeverisë:
- Rritje 50 për qind të pagave bazë sipas titujve shkencorë në dy faza.
- Vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie.
- Rritje të financimit për kërkimin shkencor, rivlerësim të orës mësimore leksion e seminar.
- Rishikim të tatimit prej 23% mbi pagesën e ngarkesës shtesë.
- Transparencë mbi buxhetin dhe të ardhurat e universiteteve publike.
