Për kreun e Partisë Demokratike, Sali Berisha ishte hipokrite sjellja që kryeministri Edi Rama bëri sot në konferencën e përbashkët për mediat me presidenten e Komisionit Europian Ursula von der Leyen, teksa fliste për planin e shpëtimit nga kriza energjitike.
“Si mund të pranohet një kryeministër i cili përdor energjinë si kamzhik kundër qytetarëve. Sikur e prodhon në Surrel dhe nuk është një e mirë publike që e ka shndërruar në mallkim për qytetarët. Merr 107 mijë biznese të cilëve ua rriti nga 71 ua bëri 2015. Ua katërfishoi bizneseve të vogla. Çfarë iu bëri furrave, ua rriti furrave, fabrikave të miellit, ndaj rritet çmimi i bukës. Qytetarët paguajnë energjinë me çdo gjë. Me fashën preken 60% e konsumatorëve. Preken nga falsifikimi i faturave. Si po vjedhin tani? Me të gjitha format. Ke pallatin me 15 hyrje, i vjetër, pa ashensor. Ai ka 5 llamba, ato shpenzojnë gjithsej 40-50 kilovatë, faturohen 60-700 kilovatë. Kush i paguajnë, qytetarët”, tha Berisha në “Open”.
Teksa shefja e KE komunikoi detaje nga plani i ndihmës së unionit për Ballkanin Perëndimor që arrin në 500 milionë euro, 80 prej të cilave shkojnë vetëm për Shqipërinë, Edi Rama u shpreh se kjo shifër “nuk mjafton” për të përballur krizën dhe inflacionin e shkaktuar nga Putin.
Por për Berishën deklaratat e Ramës janë të turpshme, pasi sipas kreut të PD, kryeministri ka luajtur bizhoz në 8 muajt e fundit me energjinë e prodhuar nga HEC-et e vendit.
Berisha ka zbardhur edhe skemën sesi është realizuar vjedhja galoponte me fitime që shkojnë në xhepat e qeveritarëve, duke bërë me dije se Shqipëria ka prodhuar 8 muajt e parë të vitit 100% të nevojave të saj për energji.
“I thoshte sot Von Der Leyen se kemi shpenzuar 460 mln euro, se po vjedh. Ky në kulmin e verës shiti energjinë te agjentë shqiptarë privatë me 40 euro, kur në bursë ishte 180 euro. Agjenti provat e shiste jashtë me 150 euro. Dhe fitimin e ndante me qeveritarët. Merrte energji nga KEK- u i Kosovës. KEK-u sillte në kohë piku. Ky në vend se të mbyllte digat dhe të konsumonte energjinë e Kosovës, e shiste në treg, bënte bixhoz dhe hapte digat. Shqipëria ka prodhuar 8 muajt e parë 100% nevojën e saj. E kam nga të gjitha burimet kompetente. Bixhoz. Merr zbraz digën, shitja, këtij, bli me 200 atje. Nuk kanë asnjë lloj kufizimi në vjedhjet që bëjnë me energjinë”, shpjegoi Berisha.
