Mbi 71 mijë familje shqiptare, të cilat sipas raporteve e tejkalojnë fashën prej 800 kWh në muaj, do të duhet të paguajnë energjinë me 42 lekë për kWh, nga 9.5 lekë që është çmimi aktual.
Kryeministri Edi Rama kishte paralajmëruar në takimet e tij me qytetarë e fermerë gjatë javës së fundit se fasha nga e cila qeveria u tërhoq në muajin tetor do të aplikohet në varësi të reshjeve të shiut.
“Lufta futi gjithë Evropën në elektroshok duke i prerë burimet e energjisë. Energjia u shtrenjtua dhe këta tani po e shesin jo sa frëngu pulën po sa frëngu harabelin. Qeveria nuk do të lejojë që kriza e energjisë të shfaqet në faturën e energjisë. Po shohim nëse kemi mundësi që të mos e vëmë në zbatim edhe për nëntorin, duhen reshje dhe kursim”, është shprehur Rama në takimet e fundit.
Për ta konfirmuar nisjen e aplikimit të çmimit të ri, Enti Rregullator i Energjisë ka lënë në fuqi sot vendimin për periudhën 1 nëntor deri në 31 dhjetor duke rrëzuar kërkesën e deputetes së opozitës Jorida Tabaku mes debateve të ashpra.
Duke nisur nga java e ardhshme të gjitha ato familje që aktualisht paguajnë mbi 9 mijë e 200 lekë në muaj do të preken nga shtrenjtimi i energjisë.
Kryetari i Entit Rregullator Petrit Ahmeti u shpreh se vendosja e fashës është një masë për të përballuar krizën energjetike me të cilën po përballet vendi.
Nuk ndan të njëjtin mendim me të deputetja e PD, Jorida Tabaku e cila e konsideron vendimin jo në interes të qytetarëve. Sipas Tabakut, rritja nuk është e drejtë pasi në bursa është shënuar një ulje e ndjeshme e çmimit të energjisë dhe gazit.
Ndërkohë, muaji tetor ka qenë relativisht i thatë duke bërë që niveli i ujit në kaskadën e Drinit të bjerë ndjeshëm dhe KESH ka dalë disa herë në import për blerje energjie.
