Kreu i Partisë Demokratike, Sali Berisha firmosi sot një marrëveshje për koalicionin zgjedhor me Partinë e Lirisë së Ilir Metës, që do t’i shohë dy forcat politike të garojnë së bashku përballë PS së Edi Ramës me kandidatë të dalë nga Primaret.
Por marrëveshja e firmosur mes Berishës e Metës vjen në një kohë që Partia Demokratike është në fazë negociatash për bashkimin e saj, teksa grupi i Alibeajt ka mandatuar Gazmend Bardhin për të negociuar me Edi Palokën.
Grupi në fjalë është rreshtuar kundër “Primareve”, por Berisha duket se nuk heq dorë prej tyre dhe kërkon me ngulm finalizimin e procesit me kandidatë të votuar nga baza e opozitës.
Të gjitha këto dilema ngrenë pikëpyetje për mënyrën sesi do të ndodhë bashkimi i PD dhe si do ta presë aleati Ilir Meta, rikthimin e grupit të Alibeajt në gjirin e selisë blu.
Çështjen në fjalë Berisha dhe Meta e kanë komentuar nga studiot e emisioneve “Open” dhe “Opinion” mbrëmjen e sotme.
Kreu i PD tha se nuk ka asnjë pengesë për grupin e Enkelejd Alibeajt që të propozojnë kandidatë për Primaret që do të zhvillohen për zgjedhjet lokale.
“Cilido që do të ketë përfaqësues në komisione, është i mirëpritur. Nëse ai kërkon komision për transparencë, nuk ka njeri ta pengojë. Le të çojë njeriu, aty të rrijë 24 orë. Është i mirëpritur të marrë pjesë në proces. Kushdo do të ketë përfaqësues në çdo komision. Të paraqesë kërkesë dhe do pranohen. Nëse kërkojnë që në çdo kuti votimi, të kenë përfaqësues, të jenë të mirëpritur. Në komisionet e numërimit. Në radhë të parë duhet të shprehë kërkesën. Secili që do të ndjekë procesin me përfaqësues të vetë, është i mirëpritur”, tha Berisha.
Berisha i ftoi ata që të bëhen pjesë e monitorimit të procesit dhe që të lobojnë për të përfshirë përfaqësuesit e tyre në grupet e numërimit të votave, por edhe të angazhojnë kandidatë që i shohin të denjë, duke kërkuar votën e simpatizantëve për ta.
“Ai grupim, sot për sot janë anëtarë të PD-së. Nëse kuptohet fakti që ata kanë të drejtë fraksioni, nuk pengohen me asgjë. E drejta më ekstreme që mund të njihet në një parti, është fraksioni. Ata kanë çdo të drejtë. Fraksioni të propozojë kandidatë me kushtin e primareve. Të nxisin 71 kandidatë për primaret”, deklaroi ai më tej.
Sakaq, edhe Meta teksa sqaronte në “Opinion” se PL nuk ka synim kreun e bashkive, por këshillat bashkiak, nënvizoi se bashkimi i PD nuk është një çështje që prish balancat.
Ai theksoi se nuk ka kushte nga PL për PD dhe se qëllimi i vetëm i tij dhe opozitës është rrëzimi i qeverisë.
“Nuk kemi asnjë kushte përveç përpjekjes për të maksimizuar energjitë e popullit opozitar për të çrrënjosur Rilindjen. Partia kryesore në opozitë është PD e dyta është PL, ne kemi dhënë një model parimor. Marrin rastin e këshillit bashkiak të Tiranës dhe PL është faktor vendimtar në këshilli, kryetari i takon PL. Rruga e bashkëpunimit është e hapur për të gjithë. Balancat tona parimore nuk lëvizin, është çështje menaxhimi të marrëdhënieve me opozitarët”, tha Meta.
