Kur na ndajnë vetëm 8 ditë nga seanca në Gjykatën e Apelit ku do të komunikohet vendimi për çështjen që lidhet me depozitimin e statutit dhe vendimeve të Kuvendit Kombëtar të PD, të datës 17.07.2021., ku u shpall kryetar Sali Berisha, vetë ky i fundit ka komentuar procesin.
Berisha foli për padinë në gjykatë mbi çështjen e vulës së partisë në emisionin “Debat” duke thënë se “gjykatësja Muçi shiti, në konceptin profesional, veten e vet për ata që dorëzuan padinë”.
Por, kreu i selisë blu nuk u ndal vetëm te konstatimet për gjyqtaren e çështje, pasi hodhi akuza të forta në drejtim të ambasadores amerikane Yuri Kim, duke thënë se ka ndikuar te vendimi.
“Ata që shpresojnë te Edi Rama, shpresojnë te Edi Rama dhe ajo është zgjidhja e tyre. Të mendosh se gjykatësja Muçi shiti, në konceptin profesional, veten e vet për ata që dorëzuan padinë. Ajo u urdhërua të marrë atë vendim nga Edi Rama. Siç kam denoncuar dhe siç e ka pohuar edhe vet nga zonja Kim, nëpërmjet Erjon Veliajt, të cilit i kërkoi të bëjë gjithçka për të shpallur palë ata që nuk ishin palë”, tha Berisha.
Sipas ish-kryeministri, kreu i Bashkisë së Tiranës, Erion Veliaj “kontrollonte Vettingun e gjykatëses Muçi”.
“Kjo është një nga aferat më korruptive”, theksoi Berisha.
