Pedagogët deklaruan vijimin e bojkotit dhe protestave edhe pas një takimi të zhvilluar këtë të Mërkurë.
Pedagogu Sandër Kovaçi ka hedhur poshtë akuzat e kryeministrit Edi Rama, i cili ka deklaruar disa ditë më parë se protesta e tyre është e motivuar politikisht. Në një intervistë për mediat, Kovaçi u shpreh se kjo është propagandë. Ai nënvizoi se protesta bëhet për arsim të lartë cilësor dhe çështje ekonomike.
“Ju e patë që nuk kishte asgjë politike, çështja është ekonomike, sociale, strukturore, që ne kërkojmë ndryshim në arsimin e lartë. Ideja e propogandës së palës tjetër për ta paraqitur si një nismë politike, është vetëm tendencë për të degjilitimuar kërkesat shumë të drejta të profesorëve dhe tendencë për të shuar akuzat që janë reale, që qeveria dhe politikbërja nuk janë marrë me universitetin. E vërteta është e kundërta. Ne nuk jemi fare me politikën, ne kemi interes kombëtar që është zhvillimi i arsimit të lartë cilësor”, theksoi ai.
Ndryshe nga herët e tjera, protesta e pedagogëve këtë të Mërkurë u organizua ndryshe. Ata mblodhën një forum me akademikë dhe studentë.
Akademikët i kanë dërguar një peticion me disa kërkesa qeverisë. Ata kërkojnë rritje 50 për qind të pagave bazë sipas titujve shkencorë në dy faza, vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie, rritje të financimit për kërkimin shkencor, rivlerësim të orës mësimore leksion e seminar, rishikim të tatimit prej 23% mbi pagesën e ngarkesës shtesë, si dhe transparencë mbi buxhetin dhe të ardhurat e universiteteve publike.
Nga ana tjetër, qeveria nuk u është përgjigjur kërkesave të tyre.
