Mjeku Ilir Alimehmeti, ka komentuar një ndër problematikat më të mëdha në Tiranë që lidhen me shërbimin urgjent për qytetarët.
I ftuar në emisionin ‘Çim Peka Live’, Alimehmeti tha se rrugët shtesë janë bërë vetëm për biçikletat, ndërsa për ambulancat nuk ka asnjë korsi specifike për raste urgjente, teksa ngrin edhe disa pikëpyetje se si ky fenomen nuk shihet nga qeveria.
“Korsia e biçikletave është edhe rruga ku të çon drejt spitalit. Po ambulanca ku kalon? Keni provuar ndonjëherë të jeni brenda një ambulance, që ke një urgjencë për të shkuar në spital edhe aty nuk ka vend ku të kalon ambulanca sepse aty është vetëm një rrugë e ngushtë që zë vetëm një makinë. Se ka menduar askush këtë? Kurrë? Asnjëhërë se ka menduar asnjëri këtë? Ti e shef që kudo që shkon, kudo ku ecën diçka të lind dhe të jep një dhimbje. Ti që e sheh dhe pyet ‘po pse duhet të jetë kështu?’ Edhe koshi i plehrave tek “Rruga e Dibrës” ka “ngrënë” rrugën,ka mbet një dictancë rreth 30-40 cm, dy veta nuk shkëmbehet dot. Si ka rënë askujt në sy këto?” tha Alimehmeti.
Ndër të tjera, Alimehmeti tha se është i gatshëm për një debat me kryebashkiakun e Erion Veliajt, ndërsa theksoi se ky i fundit s’do e bënte kurrë.
“Besoni se ai do dilte në debat me dikë? Unë jam i gatshëm, patjetër. Njerëzit duhet të vendosin vetë. Besoj fort se njerëzit vendosin vetë se cilin model duan. Në fund fare ka rëndësi se çfarë shkon tek qytetari, çfarë shërbimi. Duhet të jemi me këmbë në tokë se çfarë ajri thithim, çfarë uji pijmë, në çfarë trafiku lëviz me makinë, sa mundësi parkimi ke dhe a blen dot një shtëpi” tha Alimehmeti.
