Bojkoti i auditorëve nga ana e pedagogëve do të hyjë sot në javën e dytë, teksa Sindikata nuk tërhiqet nga kërkesat për rritje page dhe financim të shtuar për kërkimin shkencor, pavarësisht sulmeve personale të kryeministrit Edi Rama dhe shantazheve në rektorate për heqje nga puna.
Ashtu siç është paralajmëruar sot do të zhvillohet protesta e radhës kombëtare e trupës së pedagogëve, të cilët do të grumbullohen në orën 11:00 së bashku me studentët, në ambientet e jashtme të Universitetit Politeknik.
Kjo protestë pritet të jetë gjithëpërfshirëse, ku do të marrin pjesë edhe pedagogë nga universitetet e rretheve.
Kreu i Sindikatës së pedagogëve Sandër Kovaçi deklaroi të shtunën, më 21 tetor se tubimi i sotëm do të jetë masiv dhe kërkoi nga studentët t’i bashkëngjisin një listë me kërkesa asaj të pedagogëve.
