Mbyllja e fazës së parë në Kategorinë Superiore mundëson që të bëhet një bilanc i situatës së klubeve duke bërë krahasimin me një edicion më parë. Si zakonisht, ka luhatje të mëdha, me skuadra të cilat kanë fituar shumë pikë në krahasim me një vit më parë, e të tjera që kanë lënë të tilla.
Partizani kryesues i edicionit aktual, është ai i cili ka diferencën me të madhe pozitive, pasi nga 9 pikët e edicionit të kaluar në këtë moment të sezonit, ka kaluar në 19 pikë, një hov i ndjeshëm që i ka mundësuar që të përfitojnë shumë sa i përket vendeve në renditje. Pas tyre është Kastrioti që ka dyfishuar pikët, duke kaluar nga 5 pikë e sezonit të kaluar, në 10 pikë aktualisht. Ndërkohë, Vllaznia dhe Egnatia kanë nga 1 pikë më shumë se një vit më parë në fund të kësaj faze.
Sa u përket skuadrave që kanë regjistruar humbje pikësh, vendin e parë e ndajnë Teuta me Kukësin, të cilat kanë secila 6 pikë më pak se vitin e kaluar. Më pas vjen Tirana me 5 pikë më pak, e ndjekur nga Laçi me 4 pikë më pak.
