Kryeministri Edi Rama, ka sjellë edhe njëherë në vëmendje vdekjen e Lear Kurtit në Komisariatin numër 3 në Tiranë.
Nga një takim me fermerët në Fier në fjalën e tij, Rama ka akuzuar opozitën duke i quajtur “hijena” dhe se e kthejnë të vërtetën e një vdekje përmbys.
Ndër të tjera Rama tha se policia tani është mësuar “me hijenat” dhe filmon çdo gjë.
Rama: “Njerëz pa din, pa iman, pa fe, pa atdhe, hijena që arrijnë deri në pikën sa të shqyejnë në TV nga mëngjesi në darkë kufoma si kufoma e atij të shkretit që humbi jetën duke bërë çmos të ngrenë tymnaja e tension e zjarrin e urrejtjes ndaj polisisë së shtetit.
Ndërkohë që jo vetëm ka një moment njerëzillëku, ka një moment ku njeriu i thotë vetes prit cfarë shqiptari jam, si mund të kafshoj të vdekurit për të nxjerrë përfitime.
Dhe policia e të tjerët që janë në krye të detyrës për këto punë janë mësuar tani me hijenat e filmojnë të gjithën nga fillimi në fund, të gjithën e prokuroria nxjerr bashkë me policinë konkluzionin që këtu nuk kemi të bëjmë me asnjë lloj të tejkalimit të masës nga policia, por me ato që u thanë se s’dua t’i përsëris në respekt të viktimës e familjes së tij.
Si mund të besohen këta hijena kur janë në gjendje të kthejnë përmbys të vërtetën e një vdekjeje”.
