Një 34-vjeçar është gjetur i pajetë mëngjesin e sotëm në një rrugë dytësore në zonën e Fushë-Krujës.
Policia ka zbuluar se shtetasi Indrit Ndoj është gjetur pa shenja jete, por nga vlerësimet paraprake të ekspertizës rezulton se ka një dëmtim në këmbë që dyshohet të jetë shkaktuar nga një armë zjarri.
“Rreth orës 08:20, në lagjen “Bakishe Visha”, Fushë Krujë, në një rrugë dytësore është gjetur i pajetë shtetasi I. N., 34, banues ne fshatin Hasan, Krujë. Nga këqyrja paraprake, është konstatuar se 34-vjeçari ka një dëmtim në këmbë që dyshohet të jetë shkaktuar nga armë zjarri”, njofton policia.
34-vjeçari, i cili mund të ketë humbur jetën si pasojë e gjakderdhjes nga plaga e shkaktuar nga arma e zjarrit nuk është një emër i panjohur për policinë.
Kjo pasi më 19 shtator të vitit të kaluar Ndoj është vënë në pranga së bashku me 26-vjeçarin Enea Babasi, teksa transportonin emigrantë të paligjshëm nga vendet e Lindjes.
Viktima, asokohe akuzohej për veprën penale “Ndihma për kalim të paligjshëm të kufijve”, e kryer në bashkëpunim.
Ai së bashku me 26-vjeçarin është kapur në kushtet e flagrancës në Kurbin duke transportuar me automjetet e tyre “Volvo” dhe “Ford”, 19 emigrantë të paligjshëm, të cilëve iu kishin premtuar kalimin drejt vendeve të BE-së, kundrejt pagesës.
Njoftimi i policisë Lezhë:
Goditen 2 raste të dhënies ndihmë për kalim të paligjshëm të kufirit. Vihen në pranga 2 shtetas që u kapen nga shërbimet e Policisë, duke transportuar 19 emigrantë të paligjshëm të cilëve iu kishin premtuar kalimin drejt vendeve të BE-së, kundrejt pagesës. Shërbimet e Njësisë së Autostradës Milot-Morinë, në bashkëpunim me Komisariatin e Policisë Mirditë dhe strukturat e DVP Lezhë, në zbatim të planit të masave për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, pas informacioneve të marra në rrugë policore se në automjetet tip “ Volvo” dhe “Ford” po transportoheshin emigrantë të paligjshëm drejt Kosovës, organizuan punën për lokalizimin dhe ndalimin e mjeteve. Si rezultat u bë arrestimi në flagrancë i shtetasve:
-E. B., 26 vjeç dhe I.N., 33 vjeç, banues në Fushë Krujë. Këta shtetas, janë kapur në kushtet e flagrancës nga shërbimet e Policisë, në Skuraj, Kurbin, duke transportuar me automjetet e tyre “ Volvo ” dhe “Ford”, 19 emigrantë të paligjshëm, të cilëve iu kishin premtuar kalimin drejt vendeve të BE-së, kundrejt pagesës. Materialet i kaluan Prokurorisë pranë Gjykatës së Shkallës së Parë Kurbin, për veprime të mëtejshme procedurale, për veprën penale “Ndihma për kalim të paligjshëm të kufijve”, e kryer në bashkëpunim.
