Nga Boldnews.al
Këshilli i Rregullimit të Territorit ka miratuar konfiskimin e sipërfaqeve pa leje në 8 ndërtime të larta shumë pranë qendrës së Tiranës.
Por, mungesa më spektakolare në këtë listë konfiskimi është pallati me rreth 1200 metra katrorë pa leje që po ndërtohet nga kompania “Salillari” në zonën e Farkës në Tiranë.
Në 19 Tetor, Këshilli i Rregullimit të Territorit (KRRT), një strukturë e drejtuar nga kryeministri Edi Rama, ka pasur në rend të ditës miratimin e vendimit të konfiskimit mbi objektet me kate pa leje, në bazë të një Vendimi të diskutueshëm të Këshillit të Ministrave, miratuar në Korrik të këtij viti.
Listën e pallateve me sipërfaqe pa leje, të konfiskuara nga KRRT, e kryeson kompania “Xheluks”, e biznesmenit Julian (Lul) Morina, me tre objekte.
Bashkë me të janë edhe vëllezërit nga India Sandesara, të cilët akuzohen nga autoritetet e vendit të tyre për një skemë mashtrimi me vlerë qindra milionë dollarë.
Armand Lilo i “Ideal Construction” i është bindur menjëherë qeverisë, duke i dhuruar me kontratë simbolike 1 euro të gjithë sipërfaqen e ndërtuar pa leje në kullën gjigande “Syri i Tiranës”, në qendër të kryeqytetit.
Lista vijon me disa personazhe, të cilët janë thuajse të panjohur në aspektin publik, por që rezultojnë ndërtues të godinave shumë-katëshe shumë pranë qendrës së Tiranë.
Më poshtë është lista e plota e pallateve të konfiskuara:
1.Transferim në favor të shtetit me kontratë premtim shitje me vlerë 1 euro, të sipërfaqes së ndërtimit në objektin: “Godinë polifunksionale “Eyes of Tirana” 6, 8, 9, 13, 18 dhe 24 kat, me 4 kat nëntokë, faza e I-rë”, me vendndodhje në Bashkinë Tiranë, me subjekt zhvillues shoqërinë “Ideal Construction” sh.p.k.
Kompania ndërtuese është në pronësi të Armand Lilo.
- Konfiskim për interes publik të objektit: “Hotel 5 dhe 6 kat, me 2 kat nëntokë”, me vendndodhje në RR. “Qamil Guranjaku”, Bashkia Tiranë, me zhvillues shoqërinë “RT MAX” sh.p.k.
Kompania “RT Max” është në pronësi të Thanas dhe Robert Biqikut, sipas dokumentave të Qendrës Kombëtare të Biznesit.
- Konfiskim për interes publik të objektit: “Godinë banimi dhe shërbime 1, 2, 3, 4, 5 dhe 6 kat, me 2 dhe 3 kate parkimi nëntokë”, me vendndodhje në RR. “Hiqmet Buzi”, Bashkia Tiranë, me zhvillues shoqëritë “Xheluks Construksion” sh.p.k dhe “Devis Construksion” sh.p.k.
Kompania “Xheluks” është në pronësi të Julian (Lul) Morina. Ndërsa “Devis Construction” është në pronësi të Fetije Kripa (80 përqind) dhe Aleksandër Kadria (20 përqind).
- Konfiskimin për interes publik të objektit: “Godinë banimi dhe shërbime 6 kat, me 2 dhe 4 kate parkimi nëntokë”, me vendndodhje në RR. “Hiqmet Buzi”, Bashkia Tiranë, me zhvillues shoqëritë “Xheluks Construksion” sh.p.k dhe “Laxmi Real Estate & Investment” sh.p.k.
Në këtë rast, kompania “Xheluks” e Lul Morinës ka bashkëpunuar me shoqërinë “Laxmi”, e cila është në pronësi të Nitin dhe Chetankumar Sandesara.
- Konfiskim për interes publik të objektit: “Objet 7 kate, me 2 kate nëntokë”, të ndërtuar pa leje për qëllim fitimi, brenda sheshit të ndërtimit të objektit: “Godinë banimi dhe shërbime 1, 2, 3, 4, 5 dhe 6 kat, me 2 dhe 3 kate parkimi nëntokë”, me vendndodhje në RR. “Hiqmet Buzi”, Bashkia Tiranë, me zhvillues shoqëritë “Xheluks Construksion” sh.p.k dhe “Devis Construksion” sh.p.k.
Kjo është një tjetër godinë, e ndërtuar nga biznesmenët Lul Morina dhe Fetije Kripa e Aleksandër Kadria.
- Konfiskim për interes publik të objektit: “Kompleks me godina banimi dhe shërbime 4, 5, 6 dhe 7 kat, me 2 kat nëntokë”, me vendndodhje në Rrugën e Elbasanit, Bashkia Tiranë, me zhvillues shoqëritë “Xheluks Construksion” sh.p.k dhe “City Construction INC” sh.p.k.
Kompania bashkëpunuese e Morinës në këtë rast është “City Construction”, në pronësi të Elton Çaushaj.
- Konfiskimin për interes publik të sipërfaqes së ndërtuar pa leje për qëllim fitimi, në objektin: “Godinë banimi dhe shërbime 5, 7 dhe 9 kate, me 2 parkim nëntokë”, me vendndodhje në Rrugën: “Kont Urani”, Bashkia Tiranë, me zhvillues shoqërinë “Fabri D” sh.p.k.
Kompania ndërtuese “Fabri D” rezulton të jetë në pronësi të Alban Bitraj, i cili e ka blerë kompaninë në janar 2022 nga Fabjol Dushku
- Konfiskim për interes publik të objektit: “Godinë banimi dhe shërbime 4 dhe 5 – 9 kate, me 2 parkim nëntokë”, me vendndodhje në Rrugën: “Myslym Shyri”, Bashkia Tiranë, me zhvillues shoqërinë “Arb & Trans – 2010” sh.p.k.
Kompania “Arb-Trans” është në pronësi të familjes së Arben Malokut, administrator i njësisë bashkiake Zall Herr në Tiranë.
