Mazhoranca është shndërruar në qesharake me tezën e saj ku artikulohet se u tërhoq nga aplikimi i fashës së energjisë 800 kWh për abonentët familjarë sepse i dhimbsen qytetarët, në një kohë kur HEC-et e vendit prodhuan 2.74 teravat energji në 8 muajt e fundit.
Aq qesharake bëhet qeveria, sa për të mbrojtur tezën e Ramës, u detyrua sot në Kuvend i besuari i tij Taulant Balla për të falënderuar shqiptarët që e kanë përdorur shumë pak lavatriçen, duke i larë rrobat me temperaturën 30 gradë celcius.
“Duke falënderuar 1 mijë herë çdo qytetar që thirrjet e koleges Balluku për të kursyer i kanë vënë në zbatim- ju qeshnit, po mo po – për të larë rrobat me 30 gradë. Ju qeshni, se ju për të qeshur jeni. Luli qeshte më bukur, por na ka marrë malli, ai nuk vjen më”, tha Balla.
Sipas kreu të Grupit të PS pikërisht prej kursimit të qytetarëve të thjeshtë që janë kujdesur t’i dëgjojnë me vëmendje këshillat e Ballukut, u shty fasha për në një moment të dytë.
Çmimi i energjisë elektrike për muajin tetor nuk do të ndryshojë, ndërsa përgjatë këtij muaji do të rishikohet situata dhe do të vendoset nëse çmimi 42 lekë për kWh do të aplikohet gjatë muajit nëntor për të gjithë konsumatorët që kalojnë fashën 800 kilovat.
