Kryetari i PD-së, Sali Berisha e cilësoi kryeministrin Edi Rama “gjenerator negativiteti”.
Nga foltorja e Kuvendit, Berisha tha se ai firmos vetëm shkatërrime dhe largime nga Shqipëria.
“Janë të paktën shekuj mbrapa, kryekëput antishqiptare dhe jashtëzakonisht të rrezikshme për të ardhmen e vendit. Ky njeri, gjenerator negativiteti, me ardhjen në pushtet betejën kryesore e ka bërë me artistët. Bëri gjithçka gjersa rrënoi Teatrin, simbol i kombit. Ky njeri ruan, konservon për artistët atë qëndrim që mbanin etërit e tij ndaj tyre. I ati ishte skulptor, por firmosi të varin një poet në vitin 1988. Ky s’mund të firmosë varje më, por shkatërrime Teatrosh, firmos rrënime të universiteteve. Pra, ky nuk firmos dot varje, por firmos largimin masiv të mjekëve nga Shqipëria. Rrënimin me shpejtësi katastrofale të sistemit shëndetësor dhe u thotë shqiptarëve ka mungesë për 40 mijë mjekë. Mjeran me aleksi, nuk lexon dot”, tha Berisha.
“Italia është në vendin e dytë për numrin e mjekëve, por kërkon 40 mijë që të dalë në vendin e parë, të dalë para Gjermanisë. Italia ka 4 mjekë për 1 mijë banorë. Shqipëria kishte 1 mjek për 600 banorë, tani e ka për 1100 banorë. Notere e vdekjeve masive të shqiptarëve. Mos më fol pas shpine. Atë që i ke bërë ti kombit me Covidin, ti qosh. Ky nuk firmos dot për të vrarë poetin, por për të larguar masivisht studentët nga universitetet”, shtoi ai.
Berisha shprehu mbështetje dhe për protestën e pedagogëve.
“Ky nuk firmos dot për të vrarë poetin, por për të larguar masivisht studentët nga universitetet, por i vërsulet pedagogut, ish-ambasador i shkëlqyer se ka shërbyer në institucionin e sigurisë kombëtare. Më keni dëgjuar ndonjëherë mua të përmend Damian Gjiknurin, se ka shërbyer 2-3 vite drejtor në SHISH, kurrë. Për ato ja quaj merita unë. Kurse ai ka 3 ditë që u thotë shqiptarëve se një nga pedagogët më të shquar, Sandër Kovaçi ka punuar në SHIK dhe nën drejtimin e tij. Isha në Gjirokastër, me tha pedagogia unë marr 600 euro, kolegia ime në Kosovë merr 1200 euro. Po pse, më të varfër se Kosova jemi ne, që i trajtojmë në këtë mënyrë”, tha Berisha.
Kreu i PD u shpreh se në vend po ndodh një politikë e dekapitimit të elitës kombëtare.
“Sigurisht, sepse këta që kam pas, ja kërcasin biftekut 1 mijë euro. Marrin helikopterin taksi 15 mijë euro deri në Dibër. Marrin avionin taksi, 300 mijë euro për Nju Jork. Shkojnë dhe bëjnë fundjavë në Paris me avion taksi. Sigurisht se paguajnë shoferin 4 herë më shumë se lektorin në universitet. I japin kuzhinierit të vet 500 mln lekë për librin e kuzhinës. Se i merr universiteteve 700 mln lekë në kundërshtim me çdo ligj, duke shkelmuar autonominë dhe çdo gjë. Po, po. Kjo është e vërteta. Dhe prandaj pedagogët dalin, del elita e kombit, ajka e kombit janë ata. Absolutisht njëri prej tyre ka mend 3 herë më shumë se gjithë këta që janë pas shpinës time dhe rrinë e çuçurisin sa herë dal këtu. Këtu po ndodh një politikë e dekapitimit të elitës kombëtare. E qëllishme. Ç’ka ky me kombin shqiptar është shumë e vështirë ta marrësh vesh, por anti shqiptar si ky kombi nuk ka pasur në 110 vite të shtetit shqiptar”, tha Berisha.
