Kryeministri Edi Rama gjatë një takimi me simpatizantë të Partisë Socialiste në Gjirokastër ka vijuar me deklaratat “kërcënuese” ndaj shqiptarëve për të cilët tha se do të përjetojnë një dimër të vështirë.
Rama përsëriti akuzat ndaj opozitës, ndërsa shtoi se vendosja e fashës së energjisë elektrike “800 KWh” është në “dorën e Zotit”, pra të reshjeve të shiut.
“Situata është shqetësuese sepse kemi hyrë në një epokë të re rreziku e kërcënimesh. Është e paimagjinueshme dhe të mendosh një sekondë që po flitet për një luftë bërthamore që shihet si një përplasje me gurë në lagje. Një luftë bërthamore që do të thotë fundi. Jemi nën goditjen e inflacionit të luftës ndaj Vladimir Putinit. Basti i Putinit është rrëzimi i Perëndimit, nga dimri. Po flitet sot për një dimër që do të jetë më i vështirë për Europën edhe për ne në Shqipëri. Për shkak të vendosmërisë së qeverisë, jemi të pa goditur nga rritja e çmimit të energjisë, ju funksioni me çmimet e para luftës.
Qeveria është këtu për t’u bërë mburojë dhe për të mos lejuar që kriza energjetike që i ka çuar çmimet në stratosferë të shfaqet në faturën e familjeve apo të bizneseve të vogla. Pavarësisht se kemi vendosur në fashë deri në 800 kë dhe mbi 800 kemi thënë që se do paguhet çmimi real i energjisë, sërish duke parë që kishim një mundësi nuk e lamë për të futur duart me arkën e familjeve, por sërish e shtymë sepse e krijua një mundësi.
Tani jemi duke parë nëse do krijohet dot që të mos vendoset fasha në nëntor? Bashkë me kolegë të qeverisë jam me një mërzi të brendshme sa herë hapim sytë dhe nuk shohim shi, por nga ana tjetër duhet edhe kursim. Duhet kursyer dhe nuk duhen dëgjuar hienat e të djathtës ruble që skërmiet duke sharë e flasim për kursim e flasin për arrogancë , kujt ja tregojnë këta”, tha Rama.
Kujtojmë që teksa ERE kishte marrë vendimin që më 1 tetor të ndryshonte fasha e energjisë, duket se kryeministri Edi Rama u “frikësua” nga protestat e mundshme dhe ka bërë hapa pas me justifikimin se situata e reshjeve të shiut ka përmirësuar nivelin e ujit në hidrocentralet e vendit gjatë muajit tetor.
