Deputeti i Partisë Demokratike, Gazment Bardhi i është përgjigjur akuzave të kryeministrit Edi Rama lidhur me ndërtimet pa leje.
Bardhi shprehet se Rama vazhdon të gënjejë për të mbrojtur oligarkët që kanë dërtuar pa leje në mes të Tiranës.
“Edi Rama vazhdon të gënjejë për të mbrojtur oligarkët. Opozita në GJK ka kërkuar shfuqizimin e VKM që legalizon pa ligj katet shtesë të Kullave të pastrimit të parave të pista dhe korrupsionit. Konfiskimin e parashikon ligji! Zbato ligjin për oligarkët njëlloj si për çdo qytetar”, thotë Bardhi.
Teksa ndodhet në Gjirokastër, kryeministri Rama gjatë takimit me qytetarët tha se ata që kanë frymëzuar ndërtimet pa leje po ata kanë shkuar në Gjykatë Kushtetuese për të rrëzuar vendimin e qeverisë për të rrëzuar konfiskimin e ligjshëm dhe marrjen për t’ja dhënë njerëzve dhe shtetit metrat katrorë pa leje.
“Për Rilindjen urbane thoshin fasada , fasada. Por jo, por kujt t’ja thuash atyre që akoma sot nuk heqin dorë nga ideja që kanë frymëzuar ndërtime pa leje apo atyre që shkojnë në Gjykatë Kushtetuese, parti politike që do të marrë pushtetin, për të rrëzuar vendimin e qeverisë, për të rrëzuar konfiskimin e ligjshëm dhe marrjen për t’ja dhënë njerëzve dhe shtetit të gjithë metrat katrorë të ndërtuar pa leje. Këta që më akuzojnë mua që mbështesim oligarkë që i kemi ne , i kam unë kullat që do tu merret çdo metër katror e hotel që i kanë bërë pa leje, këta shkojnë në GJK për ta rrëzuar. Imagjinoni çfarë paraje po mblidhet për të blerë rrëzimin e një vendimi, kaq të rëndësishëm e kaq domethënës për të mos lejuar më , jo të bëjnë apartamente e dyqane pa leje në kulla e pallate, por të mos bëjnë më asnjë shtesë në shtëpi tradicionale”, tha Rama.
Kujtojmë që opozita shpesh herë ka denoncuar ndërtimet pa leje të kullave që kanë lulëzuar në Tiranë me “bekimin” Edi Ramës dhe Erion Veliajt, dyshja që prej disa vitesh e ka betonizuar kryeqytetin.
