Gazmend Bardhi, pas përfundimit të mbledhjes së një pjese të grupit parlamentar demokrat, ka dhënë një deklaratë për mediat së bashku me Enkelejd Alibeajn. Bardhi tha se në takimin me Edi Palokën janë ndarë mendime. Ai u shpreh se takimi ka qenë konstruktiv dhe me frymë të plotë mirëkuptimi.
Më tej, Bardhi tha se, njëanshmëria e dëmton procesin dhe se çdo rrugë e njëanshme nuk do ishte zgjidhje “për hallin tonë të përbashkët se si do mundim Edi Ramen”.
“Asnjëri nuk ka pasur një qëndrim për një çështjes të caktuar. Kemi shkëmbyer thjesht mendime. Njëanshmëria nuk e ndihmon këtë proces. Demokratët kanë nevojë të jenë bashkë për të mundur Edi Ramën dhe për të bashkëpunuar në mënyrë të sinqertë dhe këtë proces e dëmton vetëm njëanshmëria”, tha Bardhi.
Jeni pro primareve?
“Nuk kam ndërmend të bej bisedime para kamerave aq më tepër kur diskutoj me një koleg të grupit parlamentar. Sot kemi shkëmbyer disa mendime për të gjetur një rrugë se si të bashkëpunojnë demokratët për zgjedhjet lokale. Kur flas për njëanshmëri flas për qëndrime të ngurta. Nëse kemi hyrë në mënyrë të sinqertë në këtë proces nuk duhet të minojmë dialogun, mirëkuptimin dhe bisedën e sinqertë”, u përgjigj ai.
Për çfarë qëndrojnë të ngurtë?
“Nuk e kam ndjekur procesin e z.Berisha dhe besoj se as ai nuk e ka ndjekur procesin në mbledhjen e sotme. Do duhet që të krijohet një moment bashkëpunimi i sinqertë mes demokratëve për të gjetur një kandidat të përbashkët fitues. Jo vetëm një kandidat të përbashkët, por fitues”, tha.
Pse jo negociatat në selinë e PD?
“Takimi tërësisht informal, një kafe pune mes dy kolegësh. Ishte një takim informal mes kolegësh të mandatuar për të gjetur rrugë për bashkëpunimin e demokratëve. Qëndrimi i grupit parlamentar të PD-së i shpallur të hënën që shkoi ka qenë që të jemi të gatshëm të nisim punë që atë ditë”, tha Bardhi.
Edi Paloka dhe Gazment Bardhi janë dy të mandatuarit e dy grupimeve për të negociuar mundësitë dhe rrugët për bashkimin dhe daljen me kandidatë të përbashkët në zgjedhjet e ardhshme lokale. Të dy qëndruan në takim kokë më kokë për rreth 90 minuta në një nga lokalet e Tiranës këtë të martë. Pas takimit, të dy refuzuan të jepnin detaje rreth asaj që kishin biseduar, por deklaruan se do të ketë një takim të dytë.
