Kryeministri Edi Rama po zhvillon në këto momente takim me përfaqësues nga sektorë të ndryshëm, ku po diskutohen kriza ekonomike dhe ajo energjitike që ka “mbërthyer” vendin tonë.
Gjatë fjalës së tij, Rama ka deklaruar se qeveria po shikon mundësinë për të shtyrë vendosjen e fashës 800 kËh për energjinë elektrike edhe në muajin nëntor. Megjithatë, ai u shpreh se deri në këtë moment gjasat janë që kjo të mos ndodhë duke iu referuar kushteve atmosferike.
“Në Itali çdo ditë mbyllen biznese, hotele, agro turizëm sepse nuk përballojnë dot më energjinë. Kemi vendosur një fashë për të stimuluar kursimin dhe për të ulur konsumin e tepërt të energjisë. Ne mezi presim të shikojmë një mundësi të vogël që krijohet për të bërë një hap më shumë për të lehtësuar barrën e familjeve dhe bizneseve të vogla sidomos. U krijua një mundësi e vogël për ta shtyrë vendosjen e fashës dhe për të mos e vënë në muajin tetor.
Për shkak edhe të një moti të qëndrueshëm edhe sepse ka nisur një ndërgjegjësim për të kursyer. Patëm reshje. Për të fjetur gjumë rehat dhe për të thënë o sa mirë që doli dielli. Kemi ardhur në një kohë kur perëndia të na fali e shohim diellin me inat. Edhe për muajin nëntor po presim nëse do na krijohet një mundësi që për momentin nuk e kemi. Për momentin duhet të kursejmë, kursejmë energji elektrike”, tha Rama.
Kujtojmë që teksa ERE kishte marrë vendimin që më 1 tetor të ndryshonte fasha e energjisë, duket se kryeministri Edi Rama u “frikësua” nga protestat e mundshme dhe ka bërë hapa pas me justifikimin se situata e reshjeve të shiut ka përmirësuar nivelin e ujit në hidrocentralet e vendit gjatë muajit tetor.
