“Energjia është kthyer në bixhoz!”.
Kjo ishte akuza e fortë që kryetari i Partisë Demokratike, Sali Berisha artikuloi sot nga mbledhja e Kryesisë në selinë blu, ku njoftoi edhe “ndezjen e motorëve” me degët e Tiranës në krye për protestën, e cila sipas tij nuk mund të shtyhet më.
Duke komentuar lojën e shëmtuar që kryeministri Edi Rama po bën me situatën energjetike, ku përdor sipas interesit të tij tezën e fashës 800 kWh për të testuar edhe durimin e shqiptarëve, Berisha tha se ky “antishqiptar krenar nuk udhëhiqet nga logjika njerëzore”.
Më tej kreu i PD argumentoi qëndrimin e tij mbi mënyrën si KESH, OSHE dhe qeveria shqiptare po trajtojnë krizën energjetike, duke rrëzuar propagandën e Ramës se Shqipëria nuk ka kapacitete dhe burime ujore mjaftueshëm për të prodhuar energji aq sa edhe harxhon në vit.
Sipas ish-kryeministrit, vetëm në 8 muajt e fundit janë prodhuar 2.74 Teravatë energji që përmbushin 100% të nevoja të vendit për furnizim, por Shqipëria sipas tij del me humbje pasi kjo sasi është shitur me çmim të ndryshëm.
“Në 8 muaj janë prodhuar 2.74 teravatë, 100% nevoja e vendit po këta hajdutë për të mbushur xhepat shesin me çmime që vendosin vetë dhe blejnë jashtë burse energji. E kanë shndërruar energjinë në bixhozin më të madh në botë, e kanë shndërruar në një mallkim për qytetarët. Vetëm vjedhjet monstruoze të klientelës socialiste, të patronazhistëve kanë arritur në 1.1 teravat. Në krye të vjedhjeve është qeveria, e cila ka 200 milionë euro borxh Entit të Energjisë”, tha Berisha.
Lideri i opozitës pati kritika dhe për deklaratën e Ramës dhënë sot nga Përmeti ku tha se do të nisë tatimi i prodhuesve të vegjël të energjisë, duke thënë se është veprim “injoranti”.
“Sot lajmëronte se prodhuesit do të kthehen te taksa e të atit, taksë e jashtëzakonshme. Atavist. Një injorant, prodhuesit e energjisë kanë investuar dhjetëra milionë. Ai nuk ka njohuritë më elementare njeri me koncepte rudimentale. Sot thoshte ata kanë fat e fitime përrallore, por ata duhet të nxjerrin investimet e bëra. Ky tani do kthejë taksat e 46-ës. Ky duhet të përballet me qytetarët, ndaj dhe nesër do të takohem me kryetarët e degëve të Tiranës të ndajmë detyrat dhe të angazhohemi në një veprimtari shumëplanëshe. Primaret janë primare, protestat janë protesta, nuk shtyhen më. Ky ka një cinizëm ekstrem ndaj qytetarëve, të vetmit në botë që kanë këtë çmim nafte, sepse ky e taton 1.1 euro. Kjo është logjika e një njeriu që udhëhiqet nga fugat e tij psiqike dhe jo nga logjika njerëzore”, nënvizoi ai.
