Grupi i hakerave ‘Homeland Justice’ që organizuan sulmin kibernetik mbi sistemin elektronik të të dhënave e-Albania dhe dy sistemet bazë të policisë TIMS & MEMEX, kanë vijuar të publikojnë materialet që posedojnë.
Në një postim të bërë mëngjesin e sotëm në Telegram, ata kanë publikuar një dosje prej 1 GB, e cila përmban lista me numra telefoni të qytetarëve shqiptarë, për të cilat grupi pretendon se përdoren nga opozita iraniane MEK me bazë në kampin e Manzës, për qëllime terroriste.
Por, përveç 82 materialeve me të dhëna dosja përmban, ajo ç’ka bie në sy është edhe publikimi i një videoje nga një sallë e madhe e pajisur me kompjuterë, serverë dhe televizorë brenda kampit të MEK, ku shihen duke punuar disa anëtarë të organizatës.
Grupi i hakerave e cilëson atë një zyrë propagande (troll farm) në mbishkrimin sipër videos, që e përkthyer nga anglishtja do të thotë “një organizatë që punëson njerëz për të bërë postime qëllimisht fyese ose provokuese në internet me qëllim që të shkaktojë konflikt ose të manipulojë opinionin publik”.
Sipas “HomelandJustice” përmbushja e këtij misioni nga anëtarët e MEK realizohet duke përdorur numrat e telefonit dhe identitetet e shtetasve shqiptarë dhe kjo ndodh ditën për diell, të pashqetësuar brenda kampit “Ashraf 3”.
