Pas mbledhjes së kryesisë së Partisë Socialiste në selinë rozë, kryeministri Edi Rama ka sulmuar ashpër opozitën shqiptare duke e akuzuar sërish se është zhytur në thesin e rublave ruse.
Gjatë një deklarate për medit, Rama paralajmëroi se Shqipëria është e kërcënuar, ku pas tërmetit dhe pandemisë tashmë vendi ynë do të përballet me një tjetër krizë, atë ekonomike. Në përfundim të mbledhjes së Kryesisë së PS, ku u caktuan porositë për nisjen e fushatës për zgjedhjet lokale 2023, Rama tha se nuk është se ai ka ndryshuar qëndrim për opozitën, pasi mënyra si po vepron është e qartë se “mban erë”.
“Në këtë epokë kërcënimi të madh, kur Shqipëria nuk bën përjashtim nga kërcënimi, kur na duhet të përballemi me pasojat që është e re dhe vjen te ne siç erdhi tërmeti, pandemia, duhet të jemi të qartë, të vendosur, të bashkuar, të lidhur me partnerë të fuqishëm. Do ishte mirë të kishim një opozitë që të rrinte mirë në këtë kontekst, por kemi një opozitë që premton vetëm izolim nga bota dhe nga ana tjetër është e zhytur në buxhetin e rublave. Është fatkeqësi, edhe veprimtaria, edhe mënyra se si vepron në mënyrë të përditshme mbajnë erë. Ajo çka dimë nuk është e gjitha ajo që duhet ditur”, tha Rama.
