Sindikata e Punonjësve të Universiteteve ka vendosur të çojë më tej protestën e saj për rritjen e pagave.
Në një deklaratë për mediat, pedagogët, të cilët më herët deklaruan se viti i ri akademik nuk do të nisë më 17 tetor ashtu siç ishte programuar, bëjnë me dije se në mungesë të reagimit zyrtar do të vijojnë protestën nga e hëna në oborrin e çdo universiteti.
Gjithashtu, sindikata i është drejtuar me një kërkesë Institucioneve të Arsimit të Lartë që të thërrasin Asamblenë e Personelit Akademik.
‘Në mungesë të një reagimi zyrtar nga ana e institucioneve/autoriteteve që u jemi drejtuar, deklaron si më poshtë:
- Shpalljen e vijimit të protestës në mbarë universitet publike të vendit, duke filluar nga dita e hënë, datë 17 tetor 2022, nëpërmjet qëndrimit në ambientet e jashtme të çdo fakulteti (oborret e tyre), nga ora 10.00 – 12.00. Ky qëndrim lidhet me qëllimin tonë për të sensibilizuar institucionet/organet/autoritetet vendimmarrëse të arsimit të lartë në Republikën e Shqipërisë.
- Sindikata i është drejtuar me një kërkesë autoriteteve drejtuese të njësive kryesore të IAL-ve Publike, me nr. 317 prot., datë 14.10.2022, që në bazë të akteve ligjore dhe nënligjore në fuqi dhe në respekt të stafeve akademike, ndihmës akademike dhe administrative, që kanë qenë pjesë e tre protestave publike në ambientet e universiteteve tona, të organizuara nga SPUSH, të thërrasin Asamblenë e Personelit Akademik, të quajtur në ketë kërkesë si Asamble e Përgjithshme, duke ftuar në këtë organizëm/forum edhe punonjësit ndihmës akademikë/administrativë dhe përfaqësuesit e Qeverive Studentore, edhe pse këta të fundit nuk janë anëtarë të Asamblesë së Personelit Akademik. 3. Sindikata do t’u informojë në vijim për të gjitha hapat, që do të ndërmerren nga ana e organeve/autoriteteve të IAL-ve publike në lidhje me mbështetjen e tyre në aksionin tonë të përbashkët’, shkruhet në njoftim.
Gjithashtu, sindikata i dërgoi dhe një kërkesë të gjitha Institucioneve të Arsimit të Lartë që t’i Bashkohen kësaj greve.
Pak ditë më parë pedagogët refuzuan ofertën dhe tashmë vendimin e qeverisë për rritjen e pagave me 7%.
