Analisti Hysni Gurra komenton raportin e Edi Ramës me presidentin turk, Erdogan.
Në Task Force, Gurra tha se Rama i jep rëndësi Turqisë dhe presidentit Erdogan për hir të pushtetit të tij personal.
Ai shtoi se BE e ka ndihmuar Shqipërinë më shumë se Turqia, por propaganda e Ramës ka eklipsuar Brukselin dhe ka nxjerrë në pah vetëm mbështjen që vjen nga qeveria turke.
Hysni Gurra: Turqia nuk i gjendet Shqipërisë falas, jo, ka investime këtu, përfiton edhe ajo nga investimet e veta. Investimet kryesore Shqipëria i merr nga BE. Nuk është investitori kryesor Turqia. Ramës i intereson të bëjë spektakël në BE, nuk i intereson përshpejtimi i rrugës së integrimit të Shqipërisë. Edhe Turqia ka qenë gati, ka qenë një hap për t’u anëtarësuar në BE. I ra me shkelm ndërtimit të shtetit demokratik, shtetit të së drejtës, por Turqia është e fuqishme ekonomikisht, ushtarakisht, ka një rëndësi shumë të madhe edhe globale. Shqipëria është askushi. Në çfarë lloj forme Turqia do ta mbrojë Shqipërinë nëse BE i ndërpret negociatat nesër, i heq vizat minimalisht. Ramës i intereson vetëm pushteti personal. Pushtetin personal ia sigurojnë persona që janë të fuqishëm, janë të fortë, kanë ndikim. BE ka dhënë një ndihmë shumë të madhe për rastin e tërmetit. Nuk flitet fare, nuk e dëgjojmë. Turqia ka dhënë një ndihmë të rëndësishme, por shihni spektaklin që ka bërë ky, BE nuk përmendet fare, ndihma që ka dhënë Turqia është në qendër të vëmendjes së publikut. Fondet që vijnë nga BE janë të kontrolluar, ato që vijnë nga Turqia nuk i dimë si vijnë, si investohen.
