Prokuroria e Posaçme ka ankimuar sot vendimin për lirimin nga qelia të ish-deputetit socialist, Alqi Bllakos të cilit iu lehtësua masa e sigurisë në “arrest shtëpie” me argumentin se duhet të përkujdesej për tre fëmijët e mitur.
Mirëpo, SPAK nuk ka qenë dakord me këtë vendim as në seancën e katër ditëve më parë, duke paralajmëruar ankimim.
“Ne kemi qenë kundër lirimit në gjykatë sepse nuk ekzistojnë kushtet për ta liruar. Do bëjmë ankim në Gjykatën e Posaçme të Apelit”, thuhet në njoftimin e SPAK pas vendimit.
Më 2 prill, Gjykata e Posaçme dha masën paraprake të sigurisë “Arrest në burg” për Bllakon, ndërsa avokati i tij tha se ai nuk kishte lidhje me akuzat. Megjithatë, sipas togave të zeza ish-deputeti nuk mund të lirohet pasi rrezikon të prishë provat, duke qenë se hetimet për inceneratorët vazhdojnë.
Referuar njoftimit zyrtar të SPAK, ish-deputeti Alqi Bllako është i dyshuar për kryerjen e veprave penale “Shpërdorimi i detyrës”, në bashkëpunim dhe “Korrupsioni pasiv i funksionarëve të lartë shtetërorë ose i të zgjedhurve vendorë”, të parashikuara nga nenet 248, 25 dhe 260 të Kodit Penal.
Alqi Bllako në kohën që mbante postin e sekretarit të përgjithshëm të Ministrisë së Mjedisit, në bashkëpunim me ish-ministrin Lefter Koka dhe ish-kryetarin e Komisionit të Shpronësimit Pëllumb Abeshi, kanë falsifikuar dokumentin në lidhje me sipërfaqen e tokës ku u ndërtua inceneratori duke i shkaktuar dëm buxhetit të shtetit prej 16 milionë lekësh, thuhet në njoftimin e Prokurorisë.
