Kryetari i Partisë Demokratike, Sali Berisha ka bërë me dije se do të ngrejë një grup hetimi për mënyrën sesi policia ka ndërhyrë në Lazarat, në kohën kur ish-ministër i Brendshëm ishte Saimir Tahiri.
Pas takimeve në fundjavë me banorët në jug të vendit, Berisha nga seli blu tha se Rama dhe Tahiri kanë kryer krime kundër njerëzimit gjatë operacionit të tyre anti-drogë në Lazarat.
“Në të gjitha takimet, kthehem më i motivuar se kurrë në përpjekjen tonë për të shpëtuar Gjirokastrën dhe Shqipërinë nga regjimi absolutist të Edi Ramës. Mund t’u them shqiptarëve se jugu i Shqipërisë ndodhej në situatë dramatike. Shpopullimi i Gjirokastrës është i paimagjinueshëm. Shkaku ekonomik arsyeja kryesore e këtij shpopullimi. E kam menduar disa herë udhëtim tim, mund ta quaj si udhëtimin në katakombet e biznesit të jugut. Në Libohovë nga 53 kompani ndërtimi që kishte para 2013-tës sot nuk kishte asnjë. Në Gjirokastër kaloje rrugës dhe të lëndonte në shpirt kompesatoja në vitrinat e dyqaneve të falimentuara.
Nuk më hiqet mendja nga fjalët e një të moshuare, i thuaj Edi Ramës si mund të shkoj unë në Tiranë vetëm për një certifikatë, se rruga më shkon sa pensioni im. Kjo gjendje shprehej dhe në Universitetin e Gjirokastrës, sot aty dominonte mungesa masive e studentëve dhe braktisja e Universiteteve. Të gjitha masat e qeverisë çonin në shpopullimin e këtij qyteti që qëndron në kuroren e trashëgimisë kulturore.
Unë u kthema më i impresionuar se kurrë nga vizita ime në Lazarat. Edi Rama dhe Saimir Tahiri kanë kryer krime kundër njerëzimit në këtë fshat me operacionin e tyre anti-drogë, bandat e krimit të veshur me uniformë nuk kanë nguruar t’i vinin tytën e armës nënës bashkë me fëmijët. Të gjitha të dhënat janë se Edi Rama dhe Saimir Tahiri kryen krime kundër njerëzimit. Do të ngremë grupe hetimore për të hetuar, nuk do të lejojmë kurrë brutalitetin”, tha Berisha
