Rezultatet e një sondazhi të publikuar sot nga Euronews Albania treguan një rënie të konsiderueshme në pëlqyeshmërinë që shqiptarët kanë për kryeministrin Edi Rama, krahasuar me qershorin e vitit 2021 ku ai kuotohej me 52.4%.
Në sondazhin e ri, Rama për pëlqyeshmërinë ndaj liderave politikë Rama arrin pikën e tij më të ulët me vetëm 40.6%, ndërsa një qasje edhe më negative nga radhët e mazhorancës bie në sy dhe është pikërisht ajo për kryebashkiakun e Tiranës, Erion Veliaj.
“Lali Eri” është vlerësuar negativisht nga 60.4% e të pyeturve dhe vetëm 33.9% e tyre e kanë vlerësuar pozitivisht, një shifër relativisht e ulët duke parë propagandën dhe shfaqjen e përditshme me “show” në televizione, ku ai përpiqet të shitet si imazhi i një “punëtori”.
Lidhur me këto rezultate, por edhe me faktin se 60.2% e shqiptarëve janë pesimistë për ecurinë e përgjithshme në vendin tonë, një nga emrat më në zë të sektorit të ekonomisë në PS, ish-deputeti Ervin Bushati ka pohuar se të dhënat janë të vërteta e të pamohueshme.
Me 2/3 e shqiptarëve që e shohin ekonominë në pikiatë dhe çmimet e larta të ushqimeve, karburantit dhe energjisë që po iu rëndojnë frikshëm në xhepa, Bushati nënvizoi se këto përgjigje ishin mëse të pritshme.
“Dua të përgëzoj për sondazhin, është një nga të parët që mendoj se shkon në këtë logjikë. Duket se është një sondazh i vërtetë. Me krizën energjitike, me inflacionin dhe me luftën në dyert e Europës patjetër që pritet kjo përgjigje nga qytetarët nëse i pyet se si shkon situata në vend”, tha ai.
