Në mbrëmjen e 30 shtatorit Enti Rregullator i Energjisë publikoi vendimin e marrë në mbledhjen e bordit më datë 24 për vendosjen e tarifavbe të reja të energjisë, bazuar në draftin e miratuar nga qeveria, që përfshin vendosjen e fashës 800 kWh për abonentët familjarë.
Sipas vendimit, të gjitha familjet që tejkalojnë fashën 800 kWh për periudhën kohore 1 tetor-31 dhjetor (përllogaritet të jenë mbi 70 mijë familje) do të duhet të paguajnë të katërfshiuar çmimin e energjisë, që deri atë mbrëmje ishte 9 lekë për kWh.
Por, kryeministri Edi Rama në një dalje për mediat, me një lojë tallëse për shqiptarët e shqetësuar për paratë që do duhet të dalin nga xhepat e tyre, u tërhoq nga vendimi, duke thënë se të paktën për muajin tetor vendimi për rritjen e energjisë nuk do të zbatohet.
“Në 1 shtator kur ne vendosëm fashën me çmim të mbrojtur deri 800 kilovat/orë, kërkesa për energji nga KESH ishte rreth 17 mijë kilovat/orë, sot është rreth 11 mijë kilovat/orë. Në 1 shtator kur linçuam fashën mbi 800 kilovat/orë, kjo kërkesë ishte ndjeshëm më e lartë se sa ç‘është sot pra, dhe në këtë ulje të ndjeshme ka luajtur rol rënia e temperaturave të nxehta, dhe rol të rëndësishëm ka edhe fillimi i dukshëm i një qasje pozitive të abonentëve familjarë për ta kursyer energjinë”, tha Rama.
Tashmë kur kanë kaluar 5 ditë nga tërheqja e Ramës, ERE ka njoftuar mbledhjen e Bordit ditën e nesërme në orën 14:00. ERE pritet vendosë për kërkesën për pezullimin e rritjes së çmimit të energjisë që OSHEE duhet të ketë paraqitur.
Njoftimi:
MBLEDHJA Nr. 44,
Datë 07.10.2022, ora 14:00 e Bordit të ERE-s
Në zbatim të (i) nenit 13 dhe 16, të Ligjit Nr. 43/2015, “Për Sektorin e Energjisë Elektrike”; i ndryshuar, ligjit Nr.8480, date 27.5.1 999 për “Funksionimin e organeve kolegjiale te administratës shtetërore dhe enteve publike, (ii) të Rregullores së Brendshme të Organizimit dhe Funksionimit të Entit Rregullator të Energjisë (ERE), miratuar me vendimin e bordit të ERE nr. 199, datë 27.11.2020 dhe (iii), të Rregullores për Organizimin, Funksionimin dhe Procedurat e ERE-s, miratuar me vendimin e bordit të ERE nr. 96, datë 17.06.2016, njoftojmë se ditën e Premte datë 07.10.2022, ora 14:00, do të zhvillohet mbledhja nr. 44 e Bordit të ERE-s, sipas këtij rendi dite:
Për një ndryshim në vendimin nr. 242, datë 23.09.2022, të bordit të ERE-s, “Mbi miratimin e çmimit të shitjes së energjisë elektrike prej 42 lekë/kWh për konsumin mbi 800 kWh/muaj për klientët familjarë për periudhën 1 Tetor – 31 Dhjetor 2022”.
