Nënkryetari i Partisë Demokratike, Luçiano Boçi dhe ministrja e Arsimit Evis Kushi janë përplasur këtë të enjte në sallën e Kuvendit për pagat e pedagogëve dhe investimet në shkolla.
“Kongresi juaj ishte si dasma në mes të mortit, ju e keni vrarë arsimin”, tha Boçi.
Ishte Boçi që akuzoi qeverinë nga foltorja për faktin se ka braktisur pedagogët duke i lënë pa paga dhe kërkimet shekncore, ndërsa në rkahun tjetër investonmiliona euro për shpenzime luksi në kohë krize, siç është instalacioni te Kryeministria.
“Habitem si vjen ministrja e Arsimit këtu dhe thotë kemi rritur kërkimin shkencor. Harxhoni 6 milionë euro për një marrëveshje të përkohshme 3-vjecare, vetëm për të fotografuar disa kafe pa leje që i di e gjithë bota. Vini këtu dhe flisni dhe keni mbështetur kërkimin shkencor, kur kryeministri harxhon 4 milionë euro për instalacion, 5 milionë euro për të vëzhguar ndërtimet pa leje dhe pedagogëve kur kërkojnë rritjen e pagës, u thotë në formë cinike se 8% të pagës duhet ta siguroni nga universiteti”, shtoi më tej ai.
Në këtë moment, ministrja Kushi kërkoi fjalën për replikë, duke i thënë se në Partinë Demokratike janë xhelozë për suksesin e arritur nga Kongresi i Arsimit që mazhoranca zhvilloi.
“Ua sjell unë të gjithë kolegët tanë që kanë aplikuar për kërkim shkencor. I kemi pothuaj në të gjitha departamentet. I kemi me shifra. Shoh që nuk jeni dakord me rritjen deri në 15% , e thashë edhe më parë buxheti i shtetit do të mbulojë 7 % ndërsa vetë universitetet mund të rrisin pagat. Nuk janë vetëm tarifat e studentëve burim i të ardhurave. E shikoj se sa ju ka mbetur merak Kongresi i Arsimit dhe sa shumë xheloz jeni bërë për suksesin, ishit të ftuar mund të kishit ardhur. Ftesa ju erdhi të gjithëve, por nuk e dinim që ju e keni dashur me emër e mbiemër të gjithsecilit. Kongresi ishte një sukses u vlerësua dhe nga ndërkombëtarë, kishte përfaqësues nga universitete më prestigjioze, ju jeni xheloz se mbase nuk keni bërë një kongres si ai. Por të flisni për shkollat e reja duhet një guxim shumë i madh dhe të flisni për shkollën Sami Frashëri, zor se do të gjeni një infrastrukturë të tillë”, tha ministrja Kushi.
Ndërkohë, Boçi reagoi ashpër duke akuzuar qeverinë Rama dhe ministren Kushi se janë ata që do të mbahen mend për mbylljen e dhjetëra degëve të arsimit universitar.
Një ndër këto degë është mësuesia në Elbasan, ndërsa degë të tjera si matematika sipas Boçit kanë vetëm 10 apo 20 studentë.
“Besoj se kërkim shkencor ju quani edhe mbylljen e degëve. keni mbyllur biokiminë,, në Korcë, në Gjirokastër. Gjirokastra rrezikon të mbyllet si Universitet, degët e mësuesisë janë shumë të rrezikuara. Edhe në Universitetin e Elbasanit do të mbaheni mend për mbylljen e mësuesisë. Keni 10 vite që nxirrni se çfarë ka ndodhur para 10 viteve. Këtë vit matematika ka vetëm 20 studentë, a e kuptoni ku po e çoni Shqipërinë. Ju e veshët paaftësinë me Kongres. Bravo, suksese dhe urime”, shtoi nënkryetari i PD.
