Opozita ka vendosur të dalë me një kandidat të përbashkët në zgjedhjet e ardhshme lokale. Lajmi konfirmohet zyrtarisht nga Partia Demokratike, pas një takimi që kreu i kësaj force politike Sali Berisha zhvilloi me drejtues të partive aleate.
“Kryetari i Partisë Demokratike të Shqipërisë, Sali Berisha zhvilloi një takim me kryetarin e Partisë Republikane z.Fatmir Mediu, kryetarin e Partisë së të Drejtave të Njeriut z.Vangjel Dule, Kryetarin e Partisë Agrare – Ambientaliste z.Agron Duka dhe kryetarin e Lëvizjes për Zhvillim Kombëtar z.Dashamir Shehu. Në këtë takim u diskutua për bashkëpunimin midis këtyre forcave politike në zgjedhjet e ardhshme vendore dhe u ra dakord që këto forcat politike të dalin në zgjedhje me kandidat të përbashkët. Takimi u karakterizua nga fryma e mirëkuptimit të plotë”, thuhet në njoftimin e shpërndarë nga zyra e shtypit e Partisë Demokratike.
Më herët, Berisha është takuar edhe me kreun e Partisë së Lirisë Ilir Meta, i cili gjithashtu ka shprehur qëndrimin se opozita duhet të dalë me një kandidat për zgjedhjet e ardhshme vendore.
PD konfirmon në këtë mënyrë bashkëpunimin me aleatët për zgjedhjet e ardhshme lokale, megjithatë vihet re një mungesë, ajo e Shpëtim Idrizit.
Edhe pse aleat herë me një krah e më pas një tjetër, vitet e fundit Idrizi është pozicionuar me Partinë Demokratike. Në zgjedhjet e fundit parlamentare, PDIU ishte pjesë e koalicionit opozitar të udhëhequr nga Lulzim Basha dhe ka dy deputetë në parlament të zgjedhur nën logon e koalicionit: Shpëtim Idrizi dhe Mesila Doda që ishin pjesë e listës së cilësuar “e sigurt” në Tiranë.
Këtë herë, duket se Idrizi se nuk e ka ndarë mendjen ku do pozicionohet. A do të bashkohet sërish me Edi Ramën? A është një shenjë flirti me kreun e qeverisë hezitimi për të mos u bashkuar me opozitën?
Apo do të bëhet krah i grupit “Alibeaj”, që nëse vijon me të njëjtin qëndrim, gjasat janë që të garojnë të ndarë nga opozita e drejtuar nga Sali Berisha, si në zgjedhjet e pjesshme të 6 Marsit të kaluar.
Burime pranë PDIU përjashtojnë një ribashkim me Edi Ramën, megjithatë nuk ka ende një konfirmim nga vetë kreu i PDIU.
Hipoteza tjetër është se Shpëtim Idrizi është i dyzuar për të zgjedhur mes opozitës së drejtuar nga Berisha dhe grupimit Alibeaj. Ndoshta një qëndrim pritet të shprehet zyrtarisht pas një vendimi të Gjykatës së Apelit Tiranë për çështjen e Partisë Demokratike.
