Mjeku, Ilir Alimehmeti ka komentuar protestën e pedagogëve të mbajtur ditën e sotme përballë Universitetit Politeknik të Tiranës.
Ministrja Kushi iu përgjigj protestës duke thënë do të parashikohet një rritje prej 7% nga buxheti i shtetit dhe 8% nga vetë universitetet për rritjen e rrogave. Sipas Alimehmetit, kjo shifër është shumë larg pritshmërive të pedagogëve ndërsa ai theksoi autonomia në universitete nuk ekziston dhe është vetëm në letër, ndërsa shifrat për kërkimet shkencore ishin qesharake.
“Ne jemi në një distancë shumë të madhe nga Prishtina me rrogat e stafit akademik. Flasim për çdo lloj kategorie të punësuarish në sekotrin publik. Nëse ne duam të shkojmë drejt zhvillimit, nuk ndodh me diskurse apo me përqindje por duke u ulur së bashku dhe duke folur me qetësi.
Sindikata ka kërkuar 50% si rritje, 15-ta më duket si larg shifrave të kërkuara. Me këto shifra jemi shumë larg Prishtinës dhe nuk dua të shkoj ta krahasoj me Podgoricën. Njëri element është ky, pastaj autonomia. Autonomia e universiteteve është vetëm letra. Organi më i lartë është bordi i administrimit që përbëhet nga 7 vetë, 4 prej tyre janë përfaqësues të ministrisë së Arsimit. Unë nuk e gjej këtu fjalën autonomi. Sepse nuk e kemi ne shumicën.
Kemi ndër fondet më të ulëta për fondet e kërkimit shkencor, i kemi 10 herë më të ulëta. Është një fond por është qesharak. Me qetësi do diskutohen pastaj sesa është forma, apo mundësia e investimit shkencor dhe është një shifër aq qesharake sa nuk vlen ta përmendim.
E gjithë kjo është për një mësimdhënie më të mirë dhe që të mos na ikin të rinjtë. Një në tre 18 vjeçarë, po ikën. Pse po ikën? Sepse gjen një ofertë më të mirë për arsimin e lartë dhe ne e dimë se vetëm një shifër shumë e vogël e tyre mund të kthehen. Cili prind do donte që fëmija 18 vjeçar t’i largohej nga shtëpia? Ata pedagogë që ju shihni janë ata që kanë mbetur, sepse shumë prej pedagogëve, janë larguar jashtë sepse e shohin se nuk ka asnjë lloj investimi.
Nëse ata nuk e kanë problem dhe rritja e rrogës nuk është e nevojshme, 15% që paska caktuar kryeministri, ta falin, ta japin me bamirësi. Ka shumë shtresa në nevojë ku mund t’i dhurojnë. Duhet të jemi konkret. Nëpër universitetet e huaja ka pedagogë dhe studentë shqiptarë. Ndërsa në universitetet shqiptare nuk ka pedagogë dhe studentë të huaj”-tha Alimehmeti pwr fax news.
Më tej, mjeku u shpreh se nëse duhej të kishte një negocim mes palëve dhe jo denigrim, pas të rinjtë po largohen çdo ditë e më shumë nga vendi.
“Duhet të jetë një kambanë e fortë që me mijëra të fëmijë që sapo kanë dalë nga mosha minorene, aplikojnë për të ikur jashtë. Kjo do thotë se do ketë degë që mbyllen kudo dhe universitete të reduktuara. Duhet të jemi konkretë, këtu kemi një problem, nëse kjo nuk pranohet nuk e gjejmë dot zgjidhjen.
Ka gjithmonë një justifikim për gjithçka ministrja që ju përmendët. Që nga 2005 ne nuk kemi parë më asgjë sa i takon rritjes së pagave. Ka një kërkesë dhe një oferët, ka një negocim dhe jo denigrim. Mjafton të shohim Kosovën. A nuk janë ata në krizë? Nëse kriza është globale, por atëherë nëse kriza është kombëtare, le të na thotë. Për çfarë na duhen neve arritjet nëse fëmijët tanë dhe rinia nuk është këtu? Po nuk investove fillimisht tek familja, më pas tek arsimi parauniversitar dhe ai universitar, këtë kosto e paguan e gjithë shoqëria”– u shpreh mjeku epidemiolog.
