Në një përplasje edhe për mbulim televiziv, paraditen e sotme kryeministri Edi Rama dhe pedagogët sfiduan njëri-tjetrin me deklarata nga protesta te Universiteti Politeknik dhe nga antimitingu që kreu i qeverisë zhvilloi në UBT.
Rroga ishte thelbi i kësaj përplasje, me përfaqësuesit e Sindikatës së Pedagogëve që theksuan se rritje 50% në dy vitet e ardhshme është e panegociueshme me qeverinë, ndërsa Rama ua ktheu duke lajmëruar një rritje vetëm 7% pasi universitetet sipas tij janë autonome.
E teksa viti akademik rrezikon të mos nisë pasi pedagogët lajmëruan protestën e radhës pikërisht më 17 tetor dhe kërcënuan me lënien bosh të auditorëve nëse kërkesat e tyre s’merren për bazë, ministrja e Arsimit, Evis Kushi nxitoi që të konfirmojë atë çka tha Rama.
Pak pas mbledhjes së Këshillit të Ministrave, Kushi foli për gazetarët duke thënë se qeveria ka vendosur një kufi për rritje deri në 15%, me 7% që do të mbulohet nga buxheti i shtetit dhe pjesën tjetër që do të duhet ta financojnë vetë universitetet.
“Sot ne këshillin e ministrave morëm një vendim të rëndësishëm për pagat e pedagogëve. Po punojmë prej disa kohësh në bashkëpunim. Sot kemi vendosur që pagat të rriten deri në 15%. 7% do mbulohen nga buxheti i shtetit dhe pjesa tjetër do paguhet nga vetë universitetet në varësi të të ardhurave të tyre. Janë vetë universitetet që mund të miratojnë edhe rritje përtej këtij niveli minimal. Duhet të kuptojmë që pedagogët të ardhurat i sigurojnë jo vetëm nga paga bazë por kanë dhe shumë mundësi të tjera, ndryshe nga mësuesit, policët, zjarrfikësit, kanë mundësi të tjera jo vetëm nga buxheti i shtetit por dhe nga programet e kërkimit shkencor të BE”, tha Kushi.
