Është shtyrë seanca në gjykatën adminisrative ku po trajtohet çështja e mbylljes së kolegjit “Mehmet Akif”.
Fondacioni “Gulistan” ka kërkuar që të jetë pjesë e seancës së radhës gjyqësore e cila do të mbahet të premten. Me vendim të qeverisë Kolegjit iu hoq licensa dhe vendosi që pas 26 vitesh ky institucion arsimor të mbyllë aktivitetin në vendin tonë.
Në vendimin e qeverisë nuk jepen arsyet e mbylljes së kolegjit i cili është pjesë e fondacionit “Gulistan”. Qeveria turke ka kërkuar prej disa vitesh mbylljen e institucioneve që financohen nga kleriku Fejtullah Gylen, i akuzuar në Turqi si pjesë e grushtit të shtetit të vitit 2016.
Mbylljen e “Mehmet Akif” e dënoi edhe Partia Demokratike që përmes deputetes Albana Vokshi, e quajti një sulm të Edi Ramës për interesat e presidentit turk Erdogan. Ndërsa deputeti i PD-së Dashnor Sula kërkon transparencë për vendimin e qeverisë, ndërsa thotë se ky kolegj rezulton tek 10 institucionet më të mira arsimore në Shqipëri. Sipas PD-së nuk ka pasur asnjë raportim për shkelje të ligjeve vendase.
Nxënësit e kolegjit turk Mehmet Akif kundërshtuan me protestë vendimin e qeverisë për heqjen e licencës me argumentin se godina e re në Mëzes nisi mësimin pa u certifikuar nga ministria.
Drejtori turk i Kolegjit hodhi dyshime se kjo bëhet për shkak të kërkesave të përsëritura nga Erdogan, ndërsa ministria e Arsimit i mohoi këto aludime duke marrë përsipër edhe transferimin e nxënësve në shkolla të tjera.
