Edhe njëherë tjetër ish-kryeministri Sali Berisha i është provuar fjala, teksa hakerat e grupit HomelandJustice i kanë dhënë sot goditjen e fundit Policisë Shqiptare, duke publikuar online të dhëna nga sistemi sekret “MEMEX”, ashtu siç kreu i PD kishte paralajmëruar më 23 shtator.
Për t’iu përgjigjur qeverisë që është përpjekur të fshehë faktin se materiale konfidenciale kanë përfunduar në duart e atyre që ndërhynë në sistemin elektronik të Uniformave Blu, Berisha shprehu shqetësimin në një dalje për mediat se pse denoncimi i tij për këtë krim shtetëror nuk u mor për bazë.
“Siç kisha denoncuar para jush vendosjen në kontroll të plotë nga krimi shtetëror i të gjitha të dhënave të këtij vendi, me gjithë mohimet e papërgjegjshme të kreut të këtij shteti që funksionin si një shtet i mafies, njoftimi i mëparshëm rezulton 100% i vërtetë”, konstatoi lideri i selisë blu.
Në vijim Berisha deklaroi se dosja voluminoze me 1.7 Gb të dhëna që u publikua sot në një faqe Telegrami të grupit të hakerave HomelnadJustice mbart të dhëna për qindra “delikuentë”, të cilët ai pretendon se po njoftohen në mënyrë që të fshihen nga policia.
“Sot nga sistemi MEMEX i cili përbën kartotekën e punës 30-vjeçare të Policisë së Shtetit janë publikuar 105 mijë emra shqiptarësh të dyshuar, të hetuar për krime të ndryshme. Nga sistemi janë ekspozuar emra në mënyrë që të paralajmërohen të gjithë ata të cilët janë vëzhgim, në hetim, janë në shqyrtim për aktivitete të ndryshme kriminale. Është ky një moment jashtëzakonisht kritik për vendin që dëshmon se çdo gjë në këtë shtet të mafies ndodhet në duar të krimit. Është momenti ku Shqipëria bëhet vendi më i rrezikshëm në Ballkan dhe Europa pasi paralajmëron kështu kontingjentet e delinkuenteve të saj se janë në ndjekje, e mbikëqyrje policore dhe se duhet të largohen”, deklaroi Berisha.
