Kryetari i Partisë Demokratike, Sali Berisha ka hedhur akuza ndaj qeverisë duke thënë se prej 15 korrikut autoritetet nuk ka marrë asnjë masë për mbrojtjen e të dhënave të qytetarëve shqiptarë.
Gjatë një deklarate për mediat, Berisha theksoi se sistemi TIMS u sulmua nga hakerat qeveritarë për të zhdukur lidhjet e qeveritarëve me kriminelët. Berisha gjatë fjalës së tij nënvizoi se publikimi i listës së personave të dyshuar për krime në Shqipëri është një moment shumë i rrezikshëm për vendin.
“Unë informoj gjithashtu se nga data 15 korrik deri më sot, nuk është marrë asnjë masë e vetme për mbrojtjen e sistemeve. Të gjitha të tjerat, janë mashtrime.
Sistemet janë në mëshirë të atyre që po i sulmojnë dhe po i shkatërrojnë. Natyrisht, sistemi TIMS, sipas burimeve serioze, është sulmuar nga hakera qeveritarë, me qëllim për të zhdukur të gjitha gjurmët e lidhjeve të qeveritarëve, deputetëve, me grupet kriminale dhe trafikantët, udhëtimet e tyre të përbashkëta, të cilat janë një provë e pakontestueshme e bashkëpunimit të krimit me politikën.
Kurse, nxjerrja e të dhënave të kartotekës, përbën shkallën më ekstreme të dekonspirimit dhe dorëzimit të këtij shteti mafioz, tërësisht në duart e krimit. Dënoj me ashpërsinë më të madhe, këtë veprimtari kriminale, shtetërore”, tha Berisha.
