Një 41-vjeçar është arrestuar këtë të Hënë nga Policia e Tiranës, pasi qarkullonte me armë zjarri dhe municion luftarak.
Shtetasi P. S., 41 vjeç, banues në Tiranë, kishte thyer masën e sigurisë “Arrest në shtëpie”. Policia bën me dije se janë proceduar dhe tre shetas të tjerë, të cilët ndodheshin në mjet së bashku me 41-vjeçarin.
“Shërbimet e Komisariatit të Policisë Nr. 3, bazuar dhe në informacionet e marra në rrugë operative se në rrugën “Jordan Misja”, qarkullonte një shtetas i armatosur, kanë organizuar punën dhe kanë finalizuar me sukses operacionin policor të koduar “Escaper”.Si rezultat i këtij operacioni, u bë kapja dhe arrestimi në flagrancë i shtetasit: – P. S., 41 vjeç, banues në Tiranë, për veprën penale “Mbajtja pa leje dhe prodhimi i armëve, armëve shpërthyese dhe i municionit”. Gjithashtu, nisi procedimi penal në gjendje të lirë për shtetasit B. D., 33 vjeç, B. H., 51 vjeç dhe L. M., 26 vjeç, për veprën penale “Moskallëzimi i krimit””, njofton policia.
Gjatë kontrollit fizik P. S., efektivët i gjetën një armë zjarri pistoletë, një krehër dhe municion luftarak. Gjykata e kishte dënuar më herët këtë shtetas për veprën penale “Heqja e paligjshme e lirisë”.
Materialet i kaluan Prokurorisë, për veprime të mëtejshme procedurale.
