Kreu i PD-së Sali Berisha gjatë fjalës së tij për mediat këtë të Hënë jashtë parlamentit tha se po planifikon që në zgjedhjet lokale të hyjë si koalicion jo vetëm me ish-Presidentin Meta por edhe me parti të tjera opozitare.
Kështu ai ka paralajmëruar një koalicion të gjerë, ku do të përfshihen të gjitha partitë e spektrit të djathtë.
“Janë i gjithë spektri politik i djathtë. Do të negociohet. Janë parti parlamentare dhe jo parlamentare”, ka thënë Berisha.
I pyetur nga gazetarët për takimet që po zhvillon Lulzim Basha me disa anëtarë të PD-së, Berisha i bën thirrje Bashës që të bëjë transparent problemin e fondeve ruse.
“I vetmi koment që kam unë për Lulzim Bashën është të bëjë transparent problemin e fondeve ruse. Kjo është shumë serioze. E them në mënyrë të vendosur. Unë nuk kam komunikuar kohët e fundit, por Komisioni i Auditit i krijuar për këtë qëllim atij do ti japë të drejtën të shpjegojë këtë aktakuzë të rëndë, por tërësisht personale, pasi është faktuar se ajo nuk ka pasur lidhje me asnjë institucion të PD, nuk ka hyrë dhe dalë nga arka e PD, asnjë qindarkë. Kjo është e sigurtë. Unë mendoj se është e domosdoshme që ai të sqarojë këtë akuzë të përsëritur, tashme. U bë njëherë nga gazetarë të Mother Jones, por tani nuk janë gazetarë, por shërbime inteligjente të SHBA’, ka thënë Berisha.
Gazetarët e kanë pyetur kreun e PD-së nëse këto takime që bëhen pak muaj para zgjedhjeve lokale, i shikoni si të padëmshme.
“Nuk kam asnjë lloj impresioni. U thashë edhe njëherë, me Bashën kam vetëm këtë problem, përsa kohë ai është anëtar i PD-së dhe deputet i grupit të PD, ai duhet të bëjë transparencë dhe ky është një kusht shumë i rëndësishëm. Nuk mund të pranohet një gjë e tillë pa u sqaruar. Të gjithë presin këtë sqarim”, përgjigjet Berisha.
